Сумар дня на 11. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 11. вересня/септембра 2023 р.

Крениця Форум 2023

В тым тыжни в Креници, од середы 13. до пятниці 15. вересня/септембра буде проходил Конґрес Крениця Форум 2023. В подіі возмут участ м.ін польскій президент і запрошены головы другых держав. Цілю медженародного проєкту єст змінцняня безпекы, социяльной спійности та економічного положыня Польщы і держав реґіону Середньо-Східньой Европы. Центральным пунктом тогорічного Крениця Форум буде Польско-Кореаньскій Форум. Символичне значыня має положыня Крениці в самым серци реґіону Середньо-Східньой Европы. Зо взгляду на локализацию Польща єст стратеґічным місцьом для інтересів Полудньовой Кореі, заінтересуваной експанцийом на европейскых рынках.

Православный архієпископ Прагы і Чешскых земель Михаіл на Лемковині

Як поінформувал Православный Осередок Милосердя ЕЛЕОС Перемышльско-Ґорлицкой Єпархіі, в середу 6. вересня/септембра архієпископ Прагы і Чешскых земель Михаіл, разом з архієпископом Перемышьскым і Ґорлицкым Паісийом, одвиділи Ґладышів, де запознали ся з поступом будовляных прац при новій православній церкви. Одвиділи і Єпархіяльный Осередок Милосердя ЕЛЕОС і діючый при ним Єпархіяльный Дом Дітины. Владыка Михаіл запознал ся з діяльністю церковных благодійных інституций та стрітил ся з выхованками Дому Дітины з Украіны. Владыкы одвиділи і церков Покровы Пресвятой Богородиці в Ждыни, з котром звязаны сут молоды рокы жытя священномученика Максима Ґорлицкого.

Рекордовы чысла туристів в Креници

В Креници пал рекорд курортной оплаты. З приходів містной касы выникат, же курорт уж тепер одвиділо веце туристів як в рекордовым дотля цілым 2019 році. Як подал бургомайстер Пьотр Рыба, 2019 рік завершыли сумом 4 млн 770 тис. злотых, а тепер на початку вересня/септембра мают уж праві 6 мілийонів. Бургомайстер рахує, же тот рік можут завершыти квотом близко 8 млн злотых. Рекордове є і чысло побытів, бо квоту 6 млн зл мож перерахувати на понад 1 млн 100 тис. проданых готельовых, нічліговых і санаторийных дни. На рекордовый сезон могли влинути м.ін. літні Европейскы Ігры.

Стріча меншыновых активістів з представниками LINGUAPAX і SOASLINGUISTICS 

Моніка Переня з LINGUAPAX і Джулия Салябанк з SOASLINGUISTICS стрітили ся в сідибі Центра Заанґажуваных Досліджынь над Культуровым Тырваньом на Выділі «Артес Лібералес» на Варшавскым Університеті з активістами репрезентуючыма нацийональны і етнічны меншыны в Польшы. На місци або онляйн в стрічы брали участ преставникы Шлезаків, Вілямівян, Лемків, Мазурів, Кашебів і Литовців/Дзуків. Лемківску меншыну репрезентували проф. Олена Дуць-Файфер і Анна Масляна. Была то нагода, жебы представити ситуацию поєдных меншын в польскій державі і побесідувати о можливій спілпрацы з Linguapax International, котра єст позаурядовом орґанізацийом підпераном урядом Каталоніі. Занимат ся она языковом ріжнорідністю в Европі і на світі. Моніка Переня запросила присутных і репрезентуваны нима орґанізациі до реальной спілпрацы і шыроко одкрыла двері орґанізациі, якой єст лідерком.

ХV річниця основаня «Надіі»

В будучым місяци ансамбль Надія зо Шпротавы буде святкувал 15. річницю свого істнуваня. З той нагоды колектив просит на ювілейный концерт, котрый пройде в суботу 14. жолтня/октобра в Центрі Культуры МУЗА в Любіні о 18.00 год. Надія заграт своі найвекшы гіты та премєрово творы з найновшой платні ансамблю. Білеты на концерт мож придвати в касі МУЗЫ або через інтернет – мотузок найдете на фейсбуковым сайті Надіі.