Сумар дня на 7. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 7. вересня/септембра 2023 р.

Праздник священномученика Максима Ґорлицкого

Вчера, 6. вересня/септембра православны Лемкы молитвом споминали памят першого лемківского святого – о. Максима Сандовича. З той нагоды в ґорлицкым катедральным храмі св. Тройці проходили головны богослужыня, якы очелили архієпископ Mихаіл, владыка Православной Церкви Чешскых Земель і Словациі, пражскій єпарха, архієпископ Авель, владыка люблиньско-холмскій та місцевый архієпископ Паісий, владыка перемышльско-ґорлицкой єпархіі. Головну проповід в праздничный ден выголосил архієпископ Авель. Тогорічне свято священномученика Максима Ґорлицкого зышло ся з 40. річницьом реактивациі історичной православной перемышльской єпархіі. Вчас літургіі споминано памят першого владыкы одродженой єпархіі, архієпископа Адама (1926-2016). На ґорлицкы святкуваня прибыли поломникы з ріжных части Польщы, а і заграниці.

Дальше одновліня любовяньского граду

На граді в Любовни початком того тыжня зачали з одновліньом пілнічносхідньой стіны. Цілю проєкту, на котрый Любовняньскій Музей здобыл дотацию з Міністерства Культуры СР і Пряшівского Самосправного Краю, є охорона і презентация археолоґічных місц касарні з XVII ст., котры там oдкрыли перед 13. роками. Цілковый кошт інвестициі є на рівни більше як 1,2 мілийона евро. Фінансы будут служыти м.ін. на одновліня стіны, котра 2010 р. впала, зреконструувана буде студня. Єдночасно ся вытворит новый простір і для соколярів, котры сут частю градного двора уж 17 років. Возникне там соколярскій двір, де буде окрем іншого презентация соколярства сперед 400 років.

Грекокатолицкє поломництво на Святу Гору Явір

Грекокатолицкы вірны будут путувати на Святу Гору Явір з нагоды 98. річниці першых обявлінь Богородиці. Піше поломництво зачне ся в суботу, 9. вересня/септембра о 09.00 год. Поломникы выйдут з Ґабольтова на Пряшівщыні, де в місцевій каплици буде одслужена Божеска Літургія. Пак будут путувати через Цигельку, яка є першым русиньскым селом од полудньового берега горы Явір. 98 років тому, 8. вересня/септембра 1925 р. три Лемкыні з Высовы вертали з посвячыня римокатолицкой каплиці в словацкым Ґабольтові. Вертали в ночы, бо хотіли непостережены перейти через «зелену границю». По тым, як перешли на польску страну, клякли, жебы подякувати за щестливе поверніня. Як раз товды отримали надприродный знак, котрый был заповідю дальшых дій. Поломництво выйде на Святу Гору Явір коло 17.00 год., кєд же на тоту годину заплянувана є вечырня в місцевій каплици.

Стріча діти і молодежы при любіньскій парохіі

В суботу, 2. вересня/септембра при православній парохіі св. Тройці в Любіні одбыла ся інтеґрацийна стріча для діти і молодежы з Меджешкільного Катехетичного Пункту в Любіні. Стрічу зачали спільном молитвом, по чым зобраных привитал о. Богдан Репела, місцевый парох. Вчас подіі бесідували на тему діяльности і спілпрацы з молодежом з любіньской парохіі. Ученикы заанґажували ся в стрічу, брали участ в варштатах, науці церковного співу, а пак выслухали прелекциі на тему діяльности Братства Православной Молодежы в Любіні, котру зрыхтували Наталия Шпытко і Михал Репела. Пак был спільный ґріль, вчас котрого молоды люде дискутували на тему початку нового шкільного рока.