Сумар дня на 6. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 6. вересня/септембра 2023 р.

В Ґорлицях прошли шторічны торжества в памят священномученика Максима Ґорлицкого

Вчерашнім богослужыньом Всеночного Бдінія в катедральній церкви св. Тройці в Ґорлицях зачали ся торжества посвячены священномученикови Максимови Ґорлицкому – першому лемківскому святому. Богослужыня продолжаны сут днес од рана: о 6.00 год. ранна літургія, о 8.30 акафист перед мощами св. Максима, а о 10.00 год., по привитаню владык – Божеска Літургія. Ден памяти святого лемківской землі о. Максима Сандовича каждого рока притігат вірных православной Церкви не лем з Лемковины, але і з дальшых части Польщы та світа. В другых православных храмах сут в тот ден правлены богослужыня. Представліня св. Максима находят ся в ріжных церквах, в тым в ЗША ци на Підкарпатскій Руси. Святый Максим был канонізуваний Православном Церквом в Польщы рішыньом святого Собору Єпископів ПАПЦ і оголошеный вчас торжества проходячого 5.-6. вересня/септембра 1994 р. в катедральній церкви св. Тройці в Ґорлицях. Хоц канонізация Максима Сандовича одбыла ся по 80 роках од його смерти, православны Русины з Лемковины зачали вішати в хыжах знимкы о. Максима серед ікон такой одраз по його смерти, што вказує на розвиток його культу на долго до канонізациі. Окрем того, його памят є доднес жыва як символ траґічных подій періоду Великой Войны і русиньской ґеєнны – концентрацийного лаґру в Талергофі.

В Бодаках мож арендувати поле

Ґорлицкій Староста поінформувал о конкурсі оферт на аренду нерухомости Скарбу Державы, што находит ся в Бодаках. Нерухоміст велькости 0,4 га є незабудувана, неогороджена і неутверджена. Згідні з місцевым пляном просторного заґаздуваня нерухоміст буде арендувана під рільничы ціли. Аренду буде мож взяти на три рокы. Річна оплата чыншу выносит 1100 зл. Охочы взяти участ в конкурсі оферт на аренду ділянкы мусят вплатити вадиюм 110 зл в терміні до 9. вересня/септембра та зложыти писемну оферту в запечатаных копертах. Одкрыта част конкурсу оферт на аренду ділянкы в Бодаках пройде 12. жолтня/октобра о 9.00 год. в будинку Ґорлицкого Староства в Ґорлицях. Дрібниці найдете на сайті Староства.

Веце як 150 незнаных знимок авторства Ваголя

Іщы лем до 10. вересня/септембра мож в Cleve Carney Museum of Art i McAninch Arts Centre w College of DuPage видіти выставу пн. Andy Warhol Portfolios: A Life in Pop / Works from the Bank of America Collection. Выстава вказує 94 роботы авторства Енді Варголя, а выпожычены посередництвом Bank of America’s Art in our Communities. Серед презентуваных артефактів мож обзерати веце як 150 знимок авторства Варголя, якы скорше не были вказуваны, ци ручні друкуваны тапеты, што запроєктувал іх Варголь. Презентувана є тіж інтерактивна мапа Ню Йорку з основныма для Варголя локализациями. Выставеннычый простір обнимат іщы м.ін. історичну част, досвідчыня Студіо 54, інтерактивну інсталяцию Silver Clouds ци Фабрику Поп-артового Прінту для діти.

Заперта лісова дорога з Білянкы до Новиці

Надлісництво Лося інформує про запертя для транспортового і пішого руху лісовой дорогы з Білянкы до Новиці в місцевости Кункова. Як подає Надліслництво – згідні зо зголошеныма в минулым потребами жытелів Новиці, дорога буде выремонтувана – перебудуют верхню верству, зроблят ремонт одпроваджыня воды. Дорога буде заперта до 28. жолтня/октобра тр.

Нашли мозаіку Новосільского

Мазовєцкій Воєвідскій Консерватор Памятників вписал до реґістру памятників мазовєкого воєвідства керамічну мозаіку «Стиґматизация св. Франциска» авторства Юрия Новосільского з 1980 р. Мозаіку нашли на обшыри парохіі св. Франциска з Асижу в Ізабеліні. Через роки думали, што мозаіка є знищена, але в листопаді/новембрі минулого рока нашли єй на поді костела та перенесли до парохіяльных будинків. Композиция сохранила ся праві в цілости, але в стані вымагаючым консервациі. Подля вступной опініі проф. Кжыштофа Хмєлевского з Академіі Красных Штук в Варшаві – надає ся до транслокуваня на стіну костела. Мозаіка авторства Новосільского представлят сцену з жытя св. Франциска з Асижу – обявліня на горі Альверня, вчас котрого святый, зануреный в молитві, взріл Христа в виді розпятого Серафима і отримал кырвавы стиґматы. Парохія старала ся о выконаня мозаікы пару років.