Сумар дня на 4. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 4. вересня/септембра 2023 р.

Зачал ся остатній етап консультаций в справі проєкту желізницьовой леніі Любін-Польковиці-Ґлоґів

Зачал ся остатній цикль консультацийных стріч в справі розбудовы желізницьового получыня Ліґниця-Любін-Польковиці-Ґлоґів. Бесіды будут частю документациі для проєкту пн. «Будова желізницьовой леніі Любін-Польковиці-Ґлоґів разом з розбудовом леніі нр. 289 на одтинку Ліґниця-Рудна Ґвізданів». В рамках інвестициі плянувана єст будова новой леніі з Любіна до Польковиц і дале до місцевости Ґавожыці, при выкорыстаню істнуючой леніі до Ґлоґова. Два першы циклі стріч прошли в другій половині 2022 р., тепер зачал ся остатній етап бесід, в часі котрогых презентуваный буде рекомендуваный проєкт до реализациі. Жытелі заанґажуваных ґмін могли в попередніх консультациях і інтерентовых анкєтах представити своє становиско і оповісти ся за єдным з 5 вариянтів проєкту. Проведены в остатнім часі досліджыня і постуляты мешканців причынили ся до рішыня через власти, што найбарже корыстні буде буде выбрати опцию но. 1, тзн. траса буде вела через економічну стрефу Польковиц і обшыр ґміны Радваниці і Ґавожыці. В рамках проєкту зреализуют і м.ін. будову новой леніі долгости 30 км, новых пристанків і желізницьовий стациі в Польковицях. Інвестиция закладат тіж будову другого тору на одтинку Ліґниця-Люблін-Рудна Ґвізданів. Інформацийня стріча пройде 13. вересня/септембра в сідибі Учельні Яна Выжыковского о 17.00 год.

Ґорлиці і Бардийов хотят ся разом страти о дофінансуваня

На так давно інформували сме о навязаню спілпрацы медже ґміном Липинкы і оддаленом од ней о 60 км Біловежом на Пряшівщыні. Тепер з думком трансграничной спілпраци при спільным стараню о фінансовы середкы вышли власти міста Бардийов і в тій справі звернули ся до свого партнерского міста – Ґорлиц. Оба міста хотят разом зложыти внесок до проґраму Interreg о фінансову підпору на реализацию спільного проєкту. Задачом реализуваном по польскій страні буде заґаздуваня обшыри коло цмонтеря нр. 91 в Ґорлицях через будову видокового пункту з обшырю до рекреациі, а по словацкі страні плянуют побудувати тематичну стежку воколо місця звязаного з реліґійном культуром. На зложыня внеску міста мают час лем до кінця вересня/септембра.

Пармска Єпархія має нового єпарху

Як поінформувал порталь Конференциі Католицкых Єпископів Зъєднаных Штатів, папа римскій Франциск призначыл отця Роберта Піпту за нового єпарху Пармской Єпархіі, котра належыт під Пітсбуржску Митрополію. Новый владыка єст священником Візантийской Русиньской Єпархіі в Фініксі та актуальні єст ректором Візантийской Католицкой Семінариі святых Кірила і Методия в Пітсбурґу. Декрет o номінациі на єпарху отця Піпты был опубликуваный 31. серпня/авґуста в Вашынґтоні. Од січня/януара тр. коли то папа римскій Франциск выменувал владыку Міляна Лаха, бывшого уж владыку Пармы, на помічного єпископа Братиславской Єпархіі, єпархія в Пармі мала лем апостольского адміністратора.

«Бомбель» – іщы лем в тот вікенд!

Припоминаме, што іщы лем в найблизшый вікенд мож видіти спектакль «Бомбель», зрыхтуваный на основі оповіданя Мирка Нагача з тым самым наголовком. На подію просят Меджепоколіньова Tеатральна Ґрупа Племя та Стоваришыня ім. Мирка Нагача «Білый сокіл». Остатні два показы пройдут в суботу і неділю, 9. і 10. вересня/септембра в Ждыни при ватровиску о год. 19.30. Спектакль вырежысерувала Моніка Бабуля – думкодавчыня і ініцияторка театральной адаптациі, разом з Мариюшом Лясковскым. Спектакль презначеный єст лем для дорослых обзерачів.