Сумар дня на 29. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 29. серпня/авґуста 2023 р.

Свято покровителя православной Перемышльско-Ґорлицкой Єпархіі

Православна Парохія в Ґорлицях просит до участи в торжественных богослужынях з нагоды дня памяти священномученика Максима Ґорлицкого, якы будут проходити в днях 5. і 6. вересня/септембра в катедральній церкви св. Тройці в Ґорлицях. Торжества зачнут ся в віторок 5. вересня святочном всеночном. В ден свята, в середу 6. вересня, служены будут дві Літургіі – перша о 6.00 год., дальше о год. 8.30 буде чытаный акафист перед мощами св. Максима, а по привитаню прибывшых єрархів служена буде головна Божеска Літургія. З нагоды свята покровителя єпархіі Братство Православной Молодежы Перемышльско-Ґорлицкой Єпархіі просит до участи в VI пішым поломництві зо Ждыні до Ґорлиц. Поломництво зачне ся в віторок 5. вересня/септембра од св. Літургіі в церкви Покровы Пресвятой Богородиці в Ждыни, де св. Максим был хрещеный. Дальше поломникы підут через Ждыню, Ґладышів, Маластівску Маґуру, Прислоп, Новицю, Білянку, Шымбарк і Ропицю Польску до Ґорлиц, де возмут участ в вечырніх богослужынях. Записы до участи в поломництві сут одкрыты до 3. вересня/септембра.

Показ фільмів о Новосільскым

Ближыт ся дальша подія орґанізувана в рамках святкувань Рока Юрия Новосільского. В четвер 14. вересня/септембра в Осередку Культуры Весола в Варшаві одбуде ся показ документальных фільмів о Юрию Новосільскым. Обзерати буде мож два фільмы – «Слідами мастерів. Новосільскій на Підляшы» і «Припомнути собі рай». Першый фільм то подорож до 50. і половины 90. років до місц, де працувал артиста, і спомины з іконоґрафічных таборів, в котрых брал участ. Другій образ конфронтує артистичный доробок Новосільского з його індивідуальныма поглядами.

Каштель в Зборові буде служыл як музей

Каштель Шередія з 16. столітя, якій ся находит в Зборові, бардиівского окресу, буде служыл як музей. Каштель был в остатніх роках постепенно реконструуваный, минулорічна реконструкция была реализувана в рамках черезграничночо проєкту «Забыта краіна Лемків і Руснаків» во спілпрацы з селом Кружлів і Ґміном Устя Рускє. Створены мают быти три експозициі в єдным музею, котрый буде черезгранично служыл про туристів зо Словациі, Польщы і другых. Выставы будут тыкати м.ін. істориі каштелю, підданства, ци того, з чого жыли люде на тамтых землях. Актуально в обєкті єст рыхтуваный інтерєр, будинок плянуют отворити на конец того рока. Першый сезон для одвиджаючых буде одкрытый правдоподібно в маю будучого рока. Веце о каштелю і рыхтуваній інвестициі прочытате в дописі на нашым портали.

14. табір молодых Русинів

Обчаньскє Здружыня молоды.Русины просит до участи в 14. Таборі з молодыма по русиньскы в Малым Липнику в окресі Стара Любовня. Тота традицийна подія пройде в тым році в днях од 14. до 17. вересня/септембра. В таборі можут брати участ члены орґанізациі, але і єй симпатизанты і молоды люде, котры хотят дознати ся дашто нове о русиньскій істориі і культурі. Табір є презначеный для осіб в віку од 18. до 36. років. Проґрам буде неодолга поданый на фейсбуковым сайті здружыня. Проєкт єст реализуваный з фінансовом підпором Фонду на підпору культуры нацийональных меншын Словацкой Республикы.