Консервация поліхроміі Юрия Новосільского

Сойм ПР, як сме уж вельократно заявляли, оголосил тот рік Роком Юрия Новосільского. В січни/януарі минула сотна річниця народин того выдатного маляря, рисовника, сценоґрафа і головно – іконописця і теолоґа.

Артиста знаный є з чысленных реализаций в православных і католицкых святынях. Єдны з них находят ся в Варшаві на Воли, в церкви покровы св. Йоана Климака. Як раз переходят консервацию.

Поліхромія роблена етапами

Малярскы декорациі зроблены Юрийом Новосільскым в церкви св. Йоана Климака представляют святых, ангелів, євангелистів та выбраны сцены Нового Завіту. Іх стилистичный характер навязує до візантийского малярства. Артиста намалювал іх в нижній церкви на части бічных стін і луках скліплінь.

Юрий Новосільскій малювал сесы поліхроміі в двох етапах. Першый реализувал в 1956 р., малюючы поліхроміі на стінах абсиды. Другій раз піднял ся декорациі нижнього поверху святыні в роках 1977-1979 по єй перебудові і повекшыню. Товды то артиста вкрыл малюнками стіны нововознесеного храму вірных. В 2022 р. поліхроміі вписали до реґістру памятників.

Поліхроміі намалюваны акрильовыма фарбами найменше двакратні были консервуваны. З огляду на погіршаючый ся технічный стан, в 2022 р. рішыли провести ратунковы роботы. Ціліст была міцно забруджена, а тинк місцями попуканый. Найбарже загорожены знищыньом были фраґменты находячы ся на міцно завільгоченій східній стіні.

Верифікация робіт

На поліхроміях видно были сліды засоліня і завільгочыня. Част мала бракы в місцях одпареного тинку, котрый одлетіл. Было то наслідство стану будинку, котрый в 2018 р. поправили – вымінили ізоляцию, зробили одводніня довкола церкви. Проведены роботы зліквідували причыну завільгочыня і ушкоджынь поліхроміі.

Консерваторскы роботы зачали в липци/юлию 2023 р., але скоро перервали. Причыном было, што консерваторы нашли чысленны перемалюваня. Треба было зверифікувати проґрам робіт, котры тепер продолжуют.

Консерваторы зробили баданя, што дозволили розпознати склад заправ, усунули забруджыня і одсолили нижні части стін, зміцнили тинк специялистичныма препаратами. Проґрам консерваторскых робіт передвидує тіж усунути вторны нанесіня і дополнити малярство і ретушы.

Дотация міста на консервацию малярскых декораций Юрия Новосільского в нижній церкви св. Йоана Климака выносит 300 тис. зл. То черговый етап ремонтовых і консерваторскых робіт в тым храмі од 2018 р. при дофінансуваню міста Варшавы.