Сумар дня на 28. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 28. серпня/авґуста 2023 р.

Выняткова долина Лемковины тратит свою красу

Початком червця/юнія тр. інформували сме о протесті проти выасфальтуваню дорогы з Ясюнкы до Радоцины, яка веде м.ін. через Чорне. Початково протест поміг, ґміна Санкова та Державны Лісы рішыли выцофати ся з той думкы. На жаль тема асфальту в порожніх селах Ниского Бескіду зас вернула і як мож прочытати на фейсбуковым сайті ґміны Санкова – 24. серпня/авґуста зачал ся ремонт дорогы на одтинках Ясюнка-Радоцина, Чорне «Долгє» і Радоцина «Гора». Коли іщы осіню минулого рока першый раз явила ся ідея такой інвестициі, скоро нашла ся ґрупа противників, яка зорґанізувала інтернетову петицию проти положыню асфальту на тым фраґменті Лемковины. Петицию далше мож підписувати, а свій против в тій справі вказало уж близко 6 тис. осіб, арґументуючы то м.ін. втрачыньом натурального, унікатового місця  на річ масовой, змоторизуваной туристикы. Початок ремонту скоментувала авторка петициі Мария Стажевска, котра звернула увагу, што асфалтуваня доріг малыма одтинками, по єдній части на раз дозвалят оминути процедуры звязаны з охороном середовиска, котры сут конечны при асфальтуваню одтинків долшых як 1 км.

Выстава Давіда Здобыляка

Ґалерия SN2022A в Кракові просит в найблизшу суботу 2. вересня/септембра на вернісаж выставы Давіда Здобыляка, маляря і Лемка з Нижного Шлеска. на выставі презентуваны будут ріжного рода працы артисты – од портретів і пейзажів, через символичне, мітолоґічне і реліґійне малярство. Здобыляк в своіх працах інспірує ся загалні понятом лемківском культуром і штуком, од краєвидів до здобнівнцтва, інспірує ся і іконами і творчостю Юрия Новосільского. Вернісаж зачне ся о 19.00 год., а выставу мож буде обзерати аж до кінця жолтня/октобра, при чым тоты, котры хотят пообзерати образы артисты поза вернісажом, будут мусіти ся скорше сконтактувати з ґалерийом. Припоминаме тіж, што на нашым сайті находит ся інтервю нашой редакторкы Наталиі Малецкой-Новак з Давідом Здобыляком, з котрого можете ся більше дознати про артисту і його творчіст.

Наступна ґміна заопініювала 20-літній плян охороны Нацийонального Маґурского Парку

На так давно інформували сме о признаню неґативной опініі радныма з ґміны Крампна для 20-літнього пляну охороны Нацийонального Маґурского Парку. Тепер над пляном дебатували радны з ґміны Липинкы, де част лемківскых сел Роздзіля і Боднарка находит ся  в отулині парку. На сесиі радны разом з директором парку порушыли такы темы як однавяльна енерґія в селах в отулині ци збераня грибів в парку. Подібні як радным з Крампной, в Липинках не сподабал ся заказ будуваня маштів мобільной сіти в отулині МНП. Директор парку, Норберт Кєць нашол єднак на тото розвязаня і запропонувал будуваня неутральных маштів, котры мают припоминати дерева. Як підкрислил Кєць, того типу «штучне дерево» може вказати ся в лісі без шкоды для природы, а з корыстю для жытелів і туристів. Подібне розвязаня єст хоснуване в Нацийональным Розточаньскым Парку. Серед 13 присутных радных на сесиі – вшыткы позитивні заопініювали проєкт.

ВарштатЫ лемківскых пісен

Ансамбль «Руты Увіты» з Юлийом Дошном просят до участи в варштатах наукы лемківскых пісен. Подія пройде в середу 30. серпня/авґуста в будинку старой ремізы в Высовій о 17.00 год. і тырвала буде 3 годины. Варштаты направлены сут так на жытелів Ниского Бескіду, як і туристів – молодіж і дорослых. Не треба мати досвідчыня, а лем охоту і мотивацию. На стрічу обовязуют записы, чысло місц єст ограничене. Більше дрібниц найдете на фейсбуковым сайті ансамблю.