Сумар дня на 17. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 17. серпня/авґуста 2023 р.

Днес зачал ся Світовый Конґрес Русинів

Днес зачынат ся XVII Світовый Конґресу Русинів, котрый того рока проходит в Новым Саді в Сербіі. Конґрес зачынат ся культурным проґрамом, а пак буде головна част – три пленарны засіданя, якы пройдут в пятницю і суботу. Днес тіж до Нового Саду приходят делеґациі поєдных членьскых русиньскых орґанізаций. За Лемковину приходят делеґаты од Стоваришыня Лемків (єдной з орґанізаций-основателів СКР), але як гості берут участ тіж делеґаты Стоваришыня «Руска Бурса» в Ґорлицях. На тогорічным СКР присутны будут і нашы редакторы, так з Лемковины, як і Пряшівщыны, якы пак будут здавати реляциі з конґресовых подій. Єдным з важнійшых пунктів Конґресу сут выбору членів Світовой Рады Русинів і єй ведучого. На конец Конґресу пройдут і выборы нового председы Світового Конґресу Русинів, тепер є ним Штефан Лявинец. Члены Конґресу будут так само голосувати за принятьом Резолюциі XVII Світового Конґресу Русинів.

Річниця І Лемківской Ватры

В послідній вікенд припоминали сме важну річницю в найновшій істориі нашого народу – рівно 40 років тому загоріла в Чарній коло Устя Руского І Лемківска Ватра. Были то Пленеровы Варштаты Ансамблю Пісні і Танця «Лемковина». Специяльно на тогорічну 43. Лемківску Ватру на Чужыні в Михалові зрыхтували сме принагідну выставу, котру тепер можете видіти і на нашым портали в діґітальній версиі. Выстава ретельно вказує, хто задумал Ватру, хто вложыл серце і душу в єй орґанізацию. Заєдно одкламує она тоты інформациі, котры роками представляли теперішні орґанізаторы той подіі, котра початком 90. років ХХ ст. престала быти подійом, де маніфестувал ся лемківскій патріотичный і ідеовый дух. Першы Ватры робили ідеалисты, соспільникы, візийонеры нашого будучого. Тоты, котрым залежало на духовым розвитку цілой соспільности, на пошырюваню амбітного змісту. А тепер ся о них не бесідує. Затерат ся тото, што было в Ватрах найважнійше. Думкодавцями першых Лемківскых Ватр были Петро Трохановскій, Володислав Грабан і Ярослав Трохановскій.

Грекокатолицкій одпуст в Клокочові

В стародавным грекокатолицкым поломницкым центрі – Клокочові, одбыл ся в послідній вікенд єпархіяльный одпуст з нагоды праздника Успіня Пресвятой Богородиці. Головну архієрейску літургію в неділю одслужыл владыка Мілян Лах, помічный єпископ братиславской єпархіі. Вєдно з ним служыл і емеритуваный кошыцкій єпарха владыка Мілян Хаутур і духовенство зо Словациі і Украіны. На кінци вшыткым за кошыцкого владыку Киріла Василя, якій выконує візитацию в Індиі, подякувал протосинкель кошыцкой єпархіі архімандрита Ярослав Лайчак. На вчера до Клокочова запрошный был Піетро Паролін, державный секретар Святійшого Престола.

Ґожівскы Стрічы уж тот вікенд

А в найблизшу суботу, 19. серпня/авґуста в Ґожові Великопольскым одбудут ся ХХІХ Стрічы з Лемківском Культуром, котры орґанізує Стоваришыня Лемків. Подібні як влони, коли подія одбыла ся першый раз в новій формулі, головный концерт пройде на катедральным пляци в Ґожові. Стрічы одбудут ся в рамках циклю культурных імпрез «Добрый вечер Ґожів». В проґрамі заплянуваны выступы ЛАПіТ «Ластівочка» з Пшемкова і ґрупы Ефір і Надія. На подію красні просят члены Кружка Стоваришыня Лемків в Ґожові Великопольскым і його ведучый Іван Ґаборек. Припомнийме, што долгы рокы Стрічы з Лемківском Культуром одбывали ся пізном осінньом пором в ґожівскым Театрі ім. Остервы.