Сумар дня на 9. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 9. серпня/авґуста 2023 р.

Было символичні, зворушаючо і честно

В минулым тыжни прошла 43. Лемківска Ватра на Чужыні в Михалові, яка од 1990 р. орґанізувана єст Стоваришыньом Лемків. Мимо несприятливой погоды, бо цілу суботу ляло, на ватряным поли зобрало ся гідні Лемків. Офіцийный початок прошол в пятницьовый вечер, при присутности великого чысла представників адміністрацийных власти, а предовшыткым – лемківской соспільности прожываючой на західніх землях. Символичный оген з гір принесла проф. Олена Дуць-Файфер, котра передала го на рукы ведучого Стоваришыня Лемків Андрия Копчы, тот зас передал оген в рукы Михала Канючка і 90-річного Ярослава Канючка, якы розпалили ватру при звуках пісен «Горы Нашы» та «Тяжко жыти на чужыні», одспіваных не лем хористами ансамблів Зоря і Ластівочка, але і вшыткыма присутныма. Тот зворушаючый момент выкликал слезы неєдного ватрянина. Дальше делеґациі урядників і запрошеных гости – представників Лемків, зложыли квітя під обелиском – місцьом памяти выгнаня в рамках Акциі «Вісла». Черговым пунктом проґраму было вручыня нагороды Епіфана Дровняка – Никыфора, за вельолітні заслугы в обшыри плеканя лемківской культуры і розвиток нашой достоменности – лавреатами остало супружество Яніна і Штефан Косовскы, члены Стоваришыня Лемків, активны в жытю орґанізациі, єдны зо спілорґанізаторів ватр на чужыні. Вчас той дорічной вельопоколіньовой стрічы лемківксой соспільности мож было не лем взяти участ в важных і симболичных моментах, але тіж потішыти ся народном музиком, яка плынула зо сцены, і лемківском авторском творчістю, котра заєдно вказує на потенциял і розвиток лемківской меншыны.

Замок в Старій Любовни буде іщы цікавшый

Приблизно о місяц зачнут ся дальшы реконструкцийны роботы на Лубовняньскым Замку. Тым разом ремонтувана буде пілнічносхідня стіна, западена охоронна стіна граду, плюс цілый третій двір. Частьом проєкту є і презентация археолоґічной локалiзациі воєнных касарен – передал інформацию медиям директор музею Далібор Микулик. Роботы мают зачати ся в вересни/септембрі і потырвати до марця 2025 рока. Іх кошт має вынести 1,2 млн евро, з чого 650 тис. евро то дотация од Міністерства Культуры Словацкой Республикы, решту забезпечыт Пряшівскій Самосправный Край, котрый заряджат музейом. Як повіл директор Микулик, мурувати будут хотіти як найскорше, жебы вымурувати як найвеце перед тым, нич температура впаде ниже -5 градусів. Вчас робіт недоступный для туристіv буде выключні третій двір, де на тот момент проходят выступы соколярів – тоты перенесут на другій двір.

«На Лемковині» малюют

В Хыровій, давнійше Гыровій, од 5. до 14. серпня/авґуста проходит малярскій пленер, котрого орґанізатором є Товариство для Розвитку Музею Лемківской Культуры. Єдном з участничок пленеру є Анна Кырпан, знана слухачам ЛЕМ.фм, як авторка проґраму «70%», яка по професиі є малярком.

бесідує Анна Кырпан.

Серед присутных на пленері є трійка громадянок Украіны і двоє громадян зо Словациі, а медже нима сут знаны русиньскій соспільности малярка Мария Янко та примітивіста Мирослав Потома.