Сумар дня на 7. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 7. серпня/авґуста 2023 р.

Потенцияльна колізия термінів другого дня Великодня 2024 подля юлияньского календаря і першого дня матурального еґзаміну 2024

Спілведучый Спільной Комісиі Уряду та Нацийональных і Етнічных Меншын Григорий Куприянович скєрувал писмо до директора Центральной Еґамінацийной Комісиі в справі терміну матурального еґзаміну 2024 в звязку з потенцияльном колізийом термінів другого дня Великодня подля юлияньского календаря і першого дня матурального еґзаміну. Квестия тота єст барз важна для меншыновых соспільности в Польщы, котры хоснуют в своім реліґійным жытю юлияньскій календар, м.ін. для вірных православной Церкви. Терміны матуральных еґзамінів вызначаны сут переважно на першы дни по долгым майовым вікенді – міг бы то быти в 2024 р. понедільок 6. мая, што бы колідувало з Великодньом, котрый за юлияньскым календарьом припадат аж 5. мая, а 6. і 7. мая то святочны дни. Зато спілведучый Спільной Комісиі Уряду та Нацийональных і Етнічных Меншын звернул ся з внеском до ЦЕК взяти до увагы тот факт при усталяню терміну матуральных еґзамінів в 2024 р.

Фрескы Новосільского дождали ся реновациі

Розписы з церкви Народжыня Пресвятой Богородиці в Кентшыні авторства Юрия Новосільского – вызначного атристы-іконописця, філософа та теолоґа, будут одреставруваны. Як повіл Павел Сєбєсєвич, парох опікуючый ся церквом, розписы сут забытком світового формату, іх одновліня єст конечне для захованя діла для будучых поколінь. На ремонт фресків православана парохія отримала промесу в высокости 711 тис. зл. з урядового проґраму одбудовы забытків.

«Альманах днешньой русиньской літературы»- ждут на зголошыня

Закарпатскє Областне Науково-Культуролоґічне Общество ім. Александра Духновича і Русиньскій Культуролоґічный Клюб поінформували, што зачали рыхтуваня до выданя «Альманаху днешньой русиньской літературы» за 2023. Збераный єст материял до публикациі, зато каждый, хто хоче поділити ся своіма творами, хто пише по русиньскы і не мал находы іх печатати, прошеный єст переслати свою творчіст до кінця вересня/септембра. Адрес найдете на фейсбуковым сайті «Русиньска поезия» та в днешнім сумарі дня.

контакт: yrscyll@i.ua

На вікенд до Санока або до Высовой

13. серпня/авґуста в Саноку пройде стріча «Карпаты закляты в дереві». Подія орґанізувана єст Музейом Народного Будівництва. В проґрамі находят ся ріжного рода варштаты, м.ін. кулінарно-зілярскы ци показ робліня ґонтів, буде едукацийна стрефа Державных Лісів, стоіско з лісовом кухніом та конкурсы і забавы для наймолодшых. Пополудньовом пором зачнут ся концерты – на сцені запрезентує ся м.ін. ансамбль Древутня. А в Высовій в суботу і неділю, 13. і 14. серпня/авґуста, мож буде взяти участ в подіі «Высова пахняча зільом». В проґрамі находят ся прелекциі о зілю і медах, варштаты, конкурс на найкрасшый віночок, анімациі для наймолодшых і концерты. Полный проґрами обох подій найдете на фейсбуковых сайтах орґанізаторів: Музею Народного Будівництва в Саноку і Ґмінного Осередка Культуры в Устю Рускым.

Закрытый міст в Квятони, обовязує зміна орґанізациі руху

Повітовый Заряд Доріг в Ґорлицях інформує, што в звязку з аварийом деревняного мосту на повітовій дорозі з Квятони до Реґєтова і Смереківця буде введена часова зміна орґанізациі руху. Закрытый міст находит ся в Квятони в місци, де скручат ся в страну Шквіртного. На час ремонтовых прац власти вызначыли обізд повітовом дорогом Ґладышів-Устя Рускє і Квятон-Реґетів-Смерековец через Смерековец, Реґєтів і Шквіртне. Пляново міст зас буде одкрытый для руху коло 11. вересня/септембра.