«Слово» – 9-та неділя по Сошествії Святого Духа – неділя, 9.00 год.

Дорогы радіослухачі, по чудеснім ділі розмножіня хлібів Ісус попогнав своїх учеників, жебы насіли до лодькы і спередили Го, покы Він розпустить народ. Як так зробив, вышов на гору ся помолити.

Они намагали ся, бо силный вітор дув проти них. Ісус приходить ку ним ідучі по воді. Они, як виділи когось іти по воді, острашыли ся. Но Ісус їх заспокоїв словами: То єм Я, не бійте ся!

Петро як доказ, же то Ісус, просить прийти ку Ньому по воді. Ісус йому доволює, Подь. А Петро выступив із воды і крачав по воді. Но як видів силный вітор, волны, Петро забывать на слово Ісуса, бо тото, што ся діє коло нього, якбы йому нашептавало: Ты ідеш по воді?

Покы Петро вірив Хрістови, ішов по воді. Як заслухав ся до іншого голосу, зачінать ся топити. Але такой закричав: Господи, сохрань! А Ісус такой розтягнув руку і вытяг го і говорить йому: Чом єсь не вірив твердо мойому слову?

Тото є адресоване і нам: Покы віриме слову Хріста, слову Євангелія – слову жывого Бога, тогды якбы крачаме по водах різных сітуацій, проблем, тяжкостей жывота. А як заслухаме ся до іншого голосу, духа того світа, котрый неґує, высмівать слово Боже, што ся тогды діє? Зачінаме падати до малодушности, страты довіры, жывой віры, же Бог о вшыткім знать, же мать вшытко у своїх руках.

Так най тото днешнє слово підкріпить нашу віру, жебы сьме слухали і твердо вірили слову Хріста, а не слухали слово вітра і волн Божого противника. Слава Ісусу Хрісту!

В неділю, 6. авґуста 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 6. авґуста 2023 р. о 12.00 год. і 7. авґуста 2023 р. о 2.00 год. за русиньскым часом.