Сумар дня на 3. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 3. серпня/авґуста 2023 р.

43. Лемківска Ватра на Чужыні

Уж заран, 4. серпня/авґуста о 19.00 год зачне ся 43. Лемківска Ватра на Чужыні в Михалові – найбільшый русиньскій фестіваль в Польщы. Окрем святочного розпаліня Ватры того дня будут выступы ЛАПіТ «Ластівочка» з Пшемкова, Хору Зоря в Устя Руского, а пізным вечером запрезентуют ся Капеля Древутня, яка того рока святкує 25-літя діяльности, Бурян з Лемковины і на конец буде забава з гудаками капелі Демай. Суботній проґрам зачне ся од спортовых змагань і конкурсів для наймолодшых. В тот ден высуплят м.ін. Кычерка, Розтока, а тіж заприязненый ансамбль з Вілямовиц, якій представлят культуру малого народу – Вілямівян. В тот ден запрезентуют ся Ластівочка і Ластівчата, н’lem фольк, Секция Рапу, ґрупа з Пряшівщыны – Тераборсук, а забаву довершыт Водограй. Окрем того буде одкрытя выставы посвяченой першым Лемківскым Ватрам в Горах, споминаня на важны річниці ци переданя Нагороды ім. Никыфора.

Бардиівскы Купелі приняли більше туристів

Знане купалиско – Бардиівскы Купелі зазнали за перше пілрічя того рока єдны з найліпшых результатів чысла одвиджаючых і вернули тым способом до часів перед пандемійом COVID-19. До купель пришло більше 13.000 осіб нич влони. Чысло переночувань звекшыло ся з нецілых 84. тис. на 95.790. В тым році 49% одвиджуючых были то особы ззовни, решта участникы здравотных санаторий. Загранична клієнтеля остала на рівни около 5 %, так як то было в минулым році. До Бардиівскых Купелі нераз ходят туристы з Лемковины.

Поступы в будові церкви в Ґладышові

З дня на ден поступує будова новой православной церкви в Ґладышові. Як реляцийонує місцева парохія св. Йоана Крестителя і єй настоятель о. Ярослав Ґрич, на тот момент стоіт уж конструкция головной вежы – дзвінници, а при тым уж першы крокы ґу поставліню двох з трьох бань. Будова в остатніх місяцях приспішыла. На тот сезон плянуване єст докінчыня цілого даху, включні з банями. Нова православна церков в Ґладышові возношена є на взір неістнуючой церкви в Незнайовій, котру специялисты окрисляют як єден з найкрасшых примірів лемківской сакральной архітектуры. Фурт іщы можеме підперти тото великє діло, якым є все будова нового храму – жертвы на будову церкви мож вплачати на окремый номер конта. Окрем того парохія Рождества Йоана Крестителя в Ґладышові продає ділянку в Устю Рускым – дохід переданый буде на потребы звязаны з будовом святыні. Оголошыня о продажы ділянкы найдете на сайті investdom.gorlice.pl.

Карпатска Ватра в Яслисках

В неділю, 13. серпня/авґуста в Яслисках одбуде ся подія пн. «Звукы, смакы, барвы карпатского світа» – буде то карпатска ватра. В рамках подіі одбудут ся музичны, кулінарны і ремісничы варштаты. В проґрамі передвиджено м.ін. бесіду на тему гуцульской культуры та цікавы бесіды з гістми зо Словациі і Украіны. Вступне на вшыткы подіі дармово. Детальный проґрам найдете на сайті орґанізатора, котрым є Неформальна Ґрупа Здрій Яслиска. Партнерами подіі сут м.ін. Стовришыня Pro Carpathia, Ґмінный Осередок Культуры і Чытальництва в Яслисках ци ґміна Яслиска.