Сумар дня на 31. липця/юлия 2023 р.

Приносиме вам сумар медияльной ґрупы ЛЕМ.фм+ на ден 31. липця/юлия 2023 р.

«Скарбы деревяной сакральной архітектуры. Костелы і церкви на списку світовой спадковины UNESCO»

До кінця серпня/авґуста в Музею Народного Будівництва в Саноку мож видіти выставу пн. «Скарбы деревяной сакральной архітектуры. Костелы і церкви на списку світовой спадковины UNESCO». Цілю акциі єст упамятнити ювілей двох вписів на тоту листу – іде о 20-літя впису Деревяных костелів Полудньовой Малопольщы і 10-літя впису Деревяных церкви в польскым і украіньскым реґіоні Карпат. В рамках пленеровой выставы презентуваны сут фотоґрафіі выріжненых вписом обєктів, вказуючы іх архітектуру, внутрішню част і богате выпосажыня. Кажда знимка має свій короткій опис, в тым історичну нотатку. Серед презентуваных обєктів находит ся 6 костелів і 16 церкви, в тым святыні з Лемковины, м.ін. з Рыхвалду, Квятони ци Брунар. Выстава в Саноку буде доступна для звиджаюлых Музей Народного Будівництва до 31. серпня/авґуста, пак мож буде єй обзерати в Ґорлицях в терміні од 5. до 31. вересня/септембра.

Од початку серпня мож складати внескы з обшыри культуровой інфраструктуры і туристикы

Міністерство Культуры і Нацийональной Спадковины поінформувало, што 1. серпня/авґуста зачне ся першый набір внесків до проґраму «Пріоритет VII Культура – діяня в обшыри культуровой інфраструктуры і туристикы». Дофінансуваня ведене єст в рамках проґраму «Европейскых фондів на Інфраструктуру, Климат, Середовиско на рокы 2021-2027». Цілю єст підпора проєктів тыкаючых м.ін. шыроко пониманого зміцніня культуры ци промуваня зрівноваженой туристикы. Набір внесків веденый єст в двох катеґориях. Перша посвячена єст розвиткови культуровой інфраструктуры – іде о модерны розвязаня промуючы активну участ в культурі та поправа доступу для осіб з особливыма потребами. Друга катеґория тыкат проєктів, котрых цілю єст охорона та піднесіня атракцийности туристичных обєктів. Внескы мож складати до 29. вересня/септембра. Дрібниці і документы находят ся на сайті Міністерства Культуры і Нацийональной Спадковины.

Фундация Дикій Проєкт просит о фінансову поміч в побудуваню регабілітацийного осередка для дикых звірят в Кривій

Фундация Дикій Проєкт з Ґорлиц фурт зберат грошы на створіня осередка для дикых звірят. Ініциятором основаня осередка єст ґорлицкій доктор ветеринариі Войцєх Вуйцік, котрый од уж осмох років помагат пошкодуваным і хворым дикым звіратам вернути до іх натурального середовиска. На початку было то парудесят припадків протягом рока, тепер праві штоденні в ветеринарийній клиніці Animed доктора Вуйціка приниманы сут іжыкы, боцаны ци серны. Цілю фундациі єст побудувати в Кривій регабілітацийный осередок, де пошкодуваны звірята будут мочы вернути до сил, а пак до натуры. Буде то тіж притулок для інвазийных ґатунків, котры в натуральным середовиску шкодят, а в осередку могли бы спокіні жыти. Фундация хоче тіж вести едукацийну діяльніст, варштаты і природничы фестівалі для молодежы, школіня для самоурядовців ци науковы досліджыня. Амбітном думком на будуче єст тіж плян ведіня реінтродукциі ґатунків, котры вымерают в результаті діянь чловека. Діяльніст Фундациі і одкрытя осередка мож підтримати через вплачаня грошів на сайті zrzutka.pl: «Stwórzmy Dziki Ośrodek Rehabilitacji».

«Свято лосяньскых мазярів»

Мазярска Загорода в Лоси просит в найблизшу суботу, 5. серпня/авґуста на «Свято лосяньскых мазярів». Тогорічным головным мотивом подіі буде лемківскє народне облечыня. В проґрамі подіі находят ся концерты, варштаты о облечыню, конкурсы, стрічы і прелекциі ци показ робліня ґонтів. Орґанізаторы задбали тіж о атракциі для наймолодшых участників подіі, котры будут мочы взяти участ в стрічы «Може впаде вам до уха, што то кабат, а што чуга». Як в попередніх роках, на святі лосяньскых мазярів попрібувати буде мож своіх сил в мазярскым конкурсі. Подія зачне ся о 13.00 год., вступ платный злотівку.

фот. ФБ Музей Народного Будівництва в Саноку