Презентація обновленого журналу Отцюзнина

В суботу 29-го юла 2023-го року одбыла ся в ужгородьскім Центрі култур народностных меншын Закарпатя презентація першого чісла обновленого русиньского културно-белетрістічного журналу Отцюзнина.

Журнал выходив уж в минулости, од 2016-го до 2018-го року, но через складны условія, котры Русины на Підкарпатю мають, його робота была перервана. Теперь подарило ся обновити роботу редакції вдяка проф. Павлови Робертови Маґочійови, котрый фінанчно забезпечів посередництвом фінанцій од меценатів друкованя журналу на два рокы, цілково вісем выдань.

Отцюзнина

Наш підкарпатьскый русиньскый журнал Отцюзнина выходить як кватралник із тіражов 500 фалатків. Головным редактором є Юрій Шиповіч, голова Русиньского културолоґічного клубу.

Якраз тота орґанізація вєдно із Закарпатьскым областным науково-културолоґічным Обществом імени Александра Духновіча, котрого головов є Юрій Продан, суть выдавателями обновленого журналу. Журнал выдає ся на 40-ох сторінках, і обсягує як актулны темы, розговоры, так і русиньску історію, краєзнавство, етноґрафію, звычаї. Самособов, не хыбить ани сучасна література – проза і поезія.

Діскусія і підписаня договору

Подія, на котрій одпрезентовало ся перше по роках перервы выданя журналу, почало минутов тиха за недавно помершы русиньскы особности – Івана Туряницю, Михаіла Чухрана і Марію Ярчич.

Пак о новім выданю бісідовав шефредактор журналу Юрій Шиповіч. По його словах приговорив ся і другый з выдавателів Юрій Продан. За тым проходила жыва і плодна діскусія, в рамках котрой участны оціньовали нововыданый журнал, але так само і подали конштруктівны пропозіції, што до будучіх чісел.

Слово в діскусії взяли Павел Роберт Маґочій, Володимір Фенич, молодый писатель Мигаль Чикивдя, Михаіл Белень, Євген Жупан – голова Народной рады Русинів Закарпатя, Віра Кобулей, Петро Медвідь, і далшы.

Наперек тому, же в діскусії нашли ся різны погляды, вшыткы оцінили, же выдаваня журналу ся обновило і беруть то як важный елемент в розвитку русиньского руху на Підкарпатю. Радостнов новинов є і конштатованя головного редактора, же наперек дакількорічній перерві по оголошіню выданя нового чісла вказав ся великый інтерес о журнал меджі чітателями, котры ціле нове выданя властно такой розобрали.

На кінцю події быв пидписаный договор о співпраці меджі Русиньскым културолоґічным клубом і орґанізаційов Карпатьскый Русин, котрой головов є Василь Щербей.

Тішыть нас, же і наперек тому, же іде война, Русины на Підкарпатю далше роблять на своїй ниві в можливостях, котры теперь мають, і підкарпатьскый русиньскый рух вдяка актівным орґанізаціям продовжує.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА