СРР схвалила проґрам конґресу в Новім Саді

В пятніцю 28-го юла 2023-го року проходило за порядком 8-ме засіданя Світовой рады Русинів, выконного орґану Світового конґресу Русинів в меджіконґресовім періоді. Засіданя проходило онлайн формов.

Рада мала на проґрамі засіданя веце пунктів. Якбач найважнішым было схваліня проґраму XVII. Світового конґресу Русинів, котрый буде проходити од 17-го до 19-го авґуста 2023-го року в столиці сербской Войводины – Новім Саді.

Проґрам розділеный до трьох днів

Проґрам про делеґатів і гостів XVII. Світового конґресу Русинів є розділеный до трьох днів. В рамках четверьга, першого дня, на участників чекать културный проґрам. Приготовлена буде выстава малярьскых творів Влада Няраді в ґалерії Кулутрного центра Войводины Мілош Цырнянскі.

В тот день одбуде ся і поетічна стріча, в рамках котрой одпрезентують ся поеты і поеткы з членьскых держав СКР вєдно з домашніма русиньскыма творцями поезії. Світову раду Русинів в тот день чекать і робочій проґрам, бо у вечорных годинах одбуде ся засіданя рады.

Передаваня премій і перше пленарне засіданя

Вже традічно головный проґрам конґресу буде розділеный до двох днів, в рамках котрых одбудуть ся три пленарны засіданя.

Святочне одкрытя XVII. Світового конґресу Русинів одбуде ся в пятніцю 18-го юла в просторах Філозофічной факулты Універзіты в Новім Саді. На тот день є наплановане по святочных приговорах і выголошіня лавреатів Премії Василя Турока-Гетеша i Націоналной премії за русиньске уменя імени Івана Манайла Pro Arte Ruthenorum.

Пак вже буде конґрес продовжовати 1-ым пленарным засіданьом, в рамках котрого будуть прочітаны справы о діятельности за рокы 2021 – 2023 од председы конґресу, представителів членьскых орґанізацій із окремых держав, як і од ревізійной комісії.

На пополідне першого робочого дня є наплановане засіданя ХI. Світового форуму русиньской молодежи, як і робота по окремых комісіях Світового конґресу Русинів.

У вечорных годинах участників чекать театралне преставліня на русиньскім языку, а Світова рада Русинів буде в тот вечур мати своє друге конґресове засіданя. В тот день проґрам конґресу буде збогаченый і о Меджінародну научно-фахову конференцію під назвов Світова русиністіка днесь і в будучности.

Другый робочій день конґресу

В суботу 19-го авґуста одбуде ся другый робочій день XVII. Світового конґресу Русинів. Проґрам зачінать 2-ым пленарным засіданьом.

В рамках нього участны выслухають інформації о роботі од председів окремых конґресовых комісій, якы будуть інформовати о замірах і цілях роботы на рокы 2023 – 2025. Рішати ся пак будуть пропозіції на зміны в Шатуті Світового конґресу Русинів.

По перерві буде наслідовати презентація кандідатів на членів у новім складі Світовой рады Русинів, і голосованя о новім складі, яке буде проходити en bloc. Далше буде проходити оголошіня і голосованя за новых членів Ревізійной комісії, што буде проходити єднакым поступом – довєдна.

Друге пленарне засіданя закінчіть ся презентаційов кандідатів на председу Світового конґресу Русинів, котрый є єдночасно председом Світовой рады Русинів. По презентації є напланована перерва, почас котрой буде засідати Світова рада Русинів першый раз у новім складі.

По перерві зачне 3-тє пленарне засіданя, в рамках котрого буде выберати ся голосованьом председа Ревізійной комісії, а так само новый председа Світового конґресу Русинів. Не менше важным пунктом буде приятя Резолуції XVII. Світового конґресу Русинів, за котру так само мусять голосвати участны делеґаты.

По тых важных пунктах делеґаты іщі потвердять місце засіданя XVIIІ. Світового конґресу Русинів, котре одбуде ся за далшы два рокы, чім ся офіціално закінчіть проґрам конґресу і участны підуть на далшый културный проґрам до центра войводиньскых Русинів – Руського Керестура.

Головным орґанізатором XVII. Світового конґресу Русинів є членьска орґанізація за Сербію – Руска матка, котрой головов є проф. Михайло Фейса.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА