Сумар дня на 27. липця/юлия 2023 р.

Приносиме вам сумар медияльной ґрупы ЛЕМ.фм+ на ден 27. липця/юлия 2023 р.

Уж о хвилю 43. Лемківска Ватра на Чужыні

Знаный є уж проґрам 43. Лемківской Ватры на Чужыні, яку каждого рока в Михалові орґанізує Стоваришыня Лемків. Подія зачне ся в пятницю, 4. серпня/авґуста о 19.00 год. Окрем святочного розпаліня Ватры того дня будут выступы ЛАПіТ «Ластівочка» з Пшемкова, Хору Зоря в Устя Руского, а пізным вечером запрезентуют ся Капеля Древутня, яка того рока святкує 25-літя діяльности, Бурян з Лемковины і на конец буде забава з гудаками капелі Демай. Суботній проґрам зачне ся од спортовых змагань і конкурсів для наймолодшых. В тот ден высуплят м.ін. Кычерка, Розтока, а тіж заприязненый ансамбль з Вілямовиц, якій представлят культуру малого народу – Вілямівян. В тот ден запрезенутю ся Ластівочка і Ластівчата, н’lem фольк, Секция Рапу, ґрупа з Пряшівщыны – Тераборсук, а забаву довершыт Водограй. Окрем того буде одкрытя выставы посвяченой першым Лемківскым Ватрам в Горах, споминаня на важны річниці ци переданя Нагороды ім. Никыфора.

Вшануваня лемківскых вояків

Як припомнула православна вроцлавско-щеціньска єпархія ПАПЦ, од парох років тырват державный проєкт пн. Сохраняме (поль. Ocalamy), якого цілю єст вшанувати памят о вшыткых вояках, якы брали участ в ІІ світовій войні і бороли ся за свободу польской державы. Проєкт сперат Бюро Упамятніня Борб і Мучеництва Інституту Нацийональной Памяти. Церков хоче сохранити памят о вшыткых православных вояках, якы бороли ся за свободу польской державы. Окрем вірных православной Церкви, рекрутатми з Лемковины было гідні грекокатоликів, якы так само бороли ся за освободжыня Польщы. Цілю реченого проєкту є однайти і означыти специяльным ґрафічым знаком місця спочываня ветеранів – героів, якы брали участ в борбі за незалженіст і оборону ІІ Польской Республикы. Єпархія заохочат вшыткых парохів, але і вірных, котры знают о інчых ветеранах ІІ світовой войны, жебы долучыли ся до ініциятивы упамятніня іх місця вічного спочываня. Лемкы бороли ся м.ін. під Монте Кассіно, то м.ін. Кірил Бреян з Ізб ци Василь Спільник з Лоси.

Полонины з новом біциґльовом стежком

Будова новой біциґльовой стежкы в Полонинах, котра іде од села Влыч по село Кривый (Улич і Улич-Кривый за старым нормативным означыньом сел), почала. Пряшівскій Самосправный Край ту выбудує близко 4 кілометры трас, нову цикльолавку і альтанку, і то за 1,64 млн евро. Будова новой трасы є за порядком третім цикльопроєктом за тот рік, котрый ся реализує в рамках інвестицийной акциі Poloniny Trail, якій є заміряный на выбудуваня 86 км долгой туристичной трасы для біциґлистів. Проєкт єст фінансуваный посередництвом европейскых і державных фінансів. ПСК має мати уділ в сумі 5%.

Зыйде ся Рада пітсбуржской єпархіі

Ахієпископ і митрополита пітсбуржскій владыка Вільям Шкурла і Рада Єрархів Пітсбуржской Візантийской Католицкой Митрополитарной Церкви будут гостити од 2.-5. листопада/новембра ІІІ громаду Пітсбуржской Митрополиі. Зобраня одбуде ся в Храмі Пречыстой Дівы Мариі в Гілльсборо, Ню Джерсі. Темом громады є «Жыти нашу віру: Рушати ся допереду, цінити наше минувше». Митрополия ставлят перед собом три ціли: звекшыти знаня і цінити собі історию візантийской русиньской церкви в «Старым краю» і в ЗША, як і візантийску русиньску культуру та уменя; дознати ся о провіреных поступах, котры днес істнуют в парохіях і котры помагают роснути комунітам вірных; зробити конкретны крокы, жебы забезпечыти будучніст і розвіток тамтышньой Церкви. В громаді возме участ м.ін. проф. Павел Роберт Маґочій, котрый буде бесідувал о основателях Візантийской Католицкой Церкви в Америці. Маґочій буде презентувал і русиньску культуру та штуку. Буде вказана і збірка образів підкарпатскых малярів, м.ін. Адальберта Ерделия ци Йосифа Бокшая. Кураторком выставы є Мария Сільвестрі.