Сумар дня на 10. липця/юлия 2023 р.

Приносиме вам сумар медияльной ґрупы ЛЕМ.фм+ на ден 10. липця/юлия 2023 р.

Трансмісия православной Літургіі з Зимной Воды в TVP

Вчера, в неділю 9. липця/юлия, в рамках проґраму трансмісий і ретрансмісий православных Літургій в польскій державній телевізиі мож было обзерати на каналах TVP Kultura i TVP3 Białystok трансмісию Літургіі з православной парохіі Успіня Пресвятой Богородиці в Зимній Воді. Вірныма церкви сут выселенці, а днес уж в більшости потомны выселеных на західні землі Польщы Бортнян. Настоятельом парохіі єст лемківскій священник о. Адам Горбаль. Підчас трансмітуваной в телевізиі Службы Божой парох проповідал в двох языках. Перша част проповіди была по лемківскы – тыкала недільного чытаня з Євангелиі. Дальше о. Горбаль бесідувал по польскы. «Выбраня Ісуса то освячыня звычаів і традиций народів, іх неповторимой достоменности та освячыня іх языка через тлумачыня Божого Слова» – бесідувал парох. Дальше споминал він на траґедию, яком было примусове выселіня лемківского народу, нашых предків, «котрым были одобраны хыжы, земля, але котрым не мож было одобрати іх віры і святой традициі. Там, де повело ся перенести жыву, святу традицию в виді церкви, в тых місцях до днес перетырвала наша культура, наш язык (…)». Як подал о. Горбаль – наше близко 80-літнє покойове спілжытя з братями Поляками довело до того, же інформациі пошырюваны комуністичным апаратом безпекы (…) в однесіню до православных Лемків вказали ся неправдом. Награня Літургіі з Зимной Воды єст уж доступне до обізріня онляйн в проґрамі TVP3 «При джерелах віры».

Погар Польщы в Гокею на леді 2023 одбуде ся в Креници

Бургомайстер ґміны Крениця Пьотр Рыба потвердил, што Погар Польщы в Гокею на леді 2023 (два пілфіналы і фінал) одбудут ся кінцьом грудня/децембра тр. в Креници. Порозумліня в орґанізацийных і фінансовых квестиях з Председом Польского Звязку Гокея Мирославом Мінкіном повело ся осягнути по тым, як одвиділ Креницю і взріл змодернізувану ледову галю. Єст то першый крок до орґанізациі великых гокейовых імпрез в Креници, а в плянах сут уж подіі на 2024 і 2025 рік. Бургомайстер звернул ся тіж до Міністра Спорту і Туристикы о утворіня в Креници закопяньской філиі Осередка Олимпійскых Рыхтувань Центрального Осередка Спорту. Припомнийме, што Ледову Галю повело ся змодернізувати з середків про орґанізацию ІІІ Европейскых Ігр. Тепер місто може хоснувати нову спортову інфраструктуру до дальшого розвитку і промоциі реґіону.

Інвестициі в сельскых обшырях ґміны Крениця

Бургомайстер Крениці поінформувал і о інвестициях, якы ведены сут на сельскых обшырях ґміны. В Полянах будуване єст боіско, а в Чырній рушат будова новой пожарничой ремізы. Іщы літом зачнут ся працы в Тыличы – м.ін. пляцы забав, пляжа, будова студні і пристанку.

В середу православны Лемкы будут святкувати на Святій Горі Явір 

Рушыло ХХХІІІ Піше Поломництво Православной Молодежы на Святу Гору Явір. Поломникы перейдут од Бодаків через Бортне, Воловец, Криву, Ґладышів, Реґєтів, Ганчову і Высову. Заран, в предден свята Первоверховных Апостолів Петра і Павла в ганчівскым храмі Покровы Пресвятой Богородиці о 17. год. буде правлена всеночна. В ден свята, в середу 12. липця/юлия в церкви св. Архістратига Михала в Высовій будут привитаны прибывшы єрархы, по чым вірны выйдут на верх св. Горы Явір. О 10.00 год. зачне ся там архієрейска Літургія.

Джерело фотоґрафіі: bialystok.tvp.pl