«Слово» – 5-та неділя по Сошествії Святого Духа – неділя, 9.00 год.

Святый Василій о слуханю Божого слова говорить: Кедь чуєш Його слово або діло, не слухай недбало. Тото платить і о днешнім слові, котре нам указує на силу Хріста як Владыкы і Судцю вшыткых, а тыж на безсилность діавола.

Коли Ісус зо своїма учениками переплавив ся до ґерґесиньского края, стрітили го двоми опанованы демонами. Были так розъїджены, же нихто ся не осмілив іти по тій дорозі. Коли увиділи Ісуса, указують свою безсилность і кричать: Што тобі до нас, Ісусе, Сыну жывого Бога? Ты пришов ту перед часом нас мучіти?

Ісус доволює тоту подію на науку про нас. Указує, же тот, котрый іщі недавно наганяв страх, теперь є кроткый в притомности Хріста. А поуказаньом на слова перед часом указує, же діавол добрі знать, же буде час суду а што його чекать. Але тоту правду хоче скрывати перед людми, жебы люде не думали на суд, на пекло, на вічны мукы.

Діавол засліплює тот погляд указованьом на тото земне, на приємности, насолоды, страсти. Так як то указав у раю Єві, напрамивши єй погляд на плод, а так она уж нич інше не хотіла видіти. Так робить і з нами, нашептавать нам, не слухай, не дай ся обмеджовати, жый собі як хочеш, не вірь в даяке пекло. Так одводить од думкы на вічность.

Прото Ісус отворять уста діаволу, жебы тот і проти свойой волі признав правду о пеклі і вічных муках. Робить то про наше добро, про наше спасіня. Бо кедь нас думка на небо, на вічны добра мнохо раз не заставить перед хріхом, тогды най думка на вічны мукы буде тов баръєров перед творіньом зла.

Святый Йоан Златоустый, коли му вытыкали часты бісіды о пеклі, одповів: Дав бы Бог, жебы-м каждый день говорив о пеклі. Бо кедь каждый день будеме сходити до пекла у своїх думках, роздумуючі о його муках, не зыйдеме там по смерти, бо свій жывот напрямиме ку Богу, ку добрым ділам, ку дотримованю Божых заповідей. А тото нас хоче научати і тото днешнє слово.

В неділю, 9. юла 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 9. юла 2023 р. о 12.00 год. і 10. юла 2023 р. о 2.00 год. за русиньскым часом.