Сумар дня на 27. червця/юнія 2023 р.

Приносиме вам сумар медияльной ґрупы ЛЕМ.фм+ на ден 27. червця/юнія 2023 р.

Білоруска меншына попросила Европейскій Парлямент о інтервенцию

Представникы білоруской меншыны в Польщы хотят, жебы Европейскій Парлямент інтервеніювал в справі ліцеів з білорускым языком вчыня в підляшскым воєвідстві. Меншына не згаджат ся з інчом як дотля інтерпретацийом кураториі освіты, котра може змінити характер двох ліцеів з білорускым языком вчыня в Бєльску Підляшскым і Гайнівці. За інтерпретацийом Кураториі Освіты в Білымстоку, ученик може зрезиґнувати з вчыня языка нацийональной меншыны, што значыт, же білорускій язык в тых школах не буде уж обовязковый. Як подал ведучый Центра Білоруской Культуры в Білымстоку проф. Олег Латышонек, обі школы істнуют од 70 років і дотля не было проблемів зо способом вчыня, білорускій язык был в них обовязковый, а тепер школы можут стратити свій характер і ролю, яку полнят для меныны. В минулый четвер на пресовій конференциі проф. Латышонек передал европосланцьови Гражданьской Коаліциі Анджейови Галицкому петицию до Европейского Парляменту з просьбом о інтервенцию. Як повіл посол Галицкій, ведучый комісиі гражданьскых свобід, справедливости і внутрішніх справ Европейского Парляменту, правилом Европейской Уніі єст плеканя достоменности, вчыня языка даной соспільности при активній помочы державы, зліпшаня обставин. Не може быти погіршыня обставин, а інформация о реґресі може быти причыном для інтервенциі.

В видоковій вежы в Дукли одкрыли постійну експозицию

Як подал Воєнскій Історичный Устав Братислава – музейне одділіня Воєнного Історичного Музею Свидник, од днес одкрыта для шырокой публикы буде видокова вежа на Дукли. Найновшы працы при вежы тыкали інсталяциі першой части новой експозициі внутрі выжньой видоковой копулы. Дотля місце тото не было одкрыте для публикы – буде там мож зайти по близко 5 декадах од будовы і одкрытя. Окрем панорамічного видоку на шырокій простір польско-словацкой граници, в тым Дукляньскій Перевал, буде там мож позыскати вельо дрібницьовых інформаций не лем о самій Дукли, але і о бойовых операциях, котры там проходили в часі світовых воєн. Доступ до додатковых інформаций мож мати і завдякы модерным мультімедияльным екранам, на котрых будут позначены важны ґеоґрафічны і ориєнтацийны пункты. Окрем того в літніх місяцях того рока добудувана буде друга част постійной експозициі ”Дукляньскє поле битвы в перемінах часу” з модерным мультімедияльным ґратьом, в нижній копулі вежы. Велику част дукляньской вежы повело ся уж зреконструувати і змодернізувати, в посліднім етапі заплянуваным на яр будучого рока буде м.ін. одреставрувана зовнішня елевация. Вежу мож звиджати до 15. жолтня/октобра.

«При джерелах натуры» в в Маґурскым Нацийональным Парку

В будучым тыжни в Маґурскым Нацийональным Парку буде проходил природничый фестіваль. Подія з назвом «При джерелах натуры» одбуде ся в днях од 6. до 9. липця/юлия в Крампній. То штырі дни стріч, выкладів і варштатів в терені з природниками. Запрошены гості будут вести тематичны стрічы посвячены природничым темам, котрыма ся занимают науково. Занятя будут додатково записуваны в формі награнь і удоступняны в сіти. Кєд дахто хоче взяти участ в стрічах або варштатах – треба ся на них перше записати. На інтернетовым сайті МНП находит ся полный проґрам фестівалю і мотузкы до записів на поєдны варштаты і стрічы.