Понад 8 700 людей записало собі в Сербії материньскый язык русиньскый

Як інфрмує аґентура Рутенпрес, сербскый Ребпубліковый штатістічный уряд публіковав далшу серію резултатів Списованя жытелів 2022. Публікованы были даны о материньскім языку, віковій штруктурі населіня і віроісповіданю.

За даныма, котры были публікованы, 8 725 особ собі в Сербії записало як материньскый язык русиньскый язык. Як сьме вже інформовали скоріше, у Републіці Сербія в списованю у 2022-ім році приголосило ся ку Русинам 11 483 людей.

Русинька комуніта контінуално зменшує ся уж десяткы років. В списованю з 2011-го року іщі раховала 14 246 особ. В порівнаню з минулорічныма резултатами Русины стратили понад 19 процент населіня, 2 763 особ.

Сербскый язык як материньскый записало собі 5 607 558 гражданів, што є 84,4 процента населіня. З меншыновых языків найвеце здобыв мадяьскый язык, ку котрому як материньскому записало ся 170 875 людей, што представлює 2,6 процента. За ним слідує босняньскый язык із 145 329 приголошеныма особами, ромскый, ку котрому голосить ся 79 687 людей, і албаньскый, котрый як материньскый записало собі 65 475 особ.

Што до віковой штруктуры, найвеце Русинів у Сербії є в катеґорії од 30 до 49 років. Другов найвекшов віковов ґрупов меджі Русинами є катеґорія од 65 до 84 років, а третьов катеґорія од 50 до 65 років. Дітей до 14 років мають Русины 1 280, молодеж од 15 до 29 років рахує 1 567 особ.

Найвекшов реліґійов у Сербії є православє, ку котрому голосить ся 5 758 719 особ, што представлює 81 процент. Далше в країні приголосили ся католици, мусулманы, протестанты, але і членове жыдівской реліґійной громады. Атеісты творять лем 1,1 процента населіня, і як аґностік декларовало ся 0,1 процента жытелів.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА