Сумар дня на 19. червця/юнія 2023 р.

Приносиме вам сумар медияльной ґрупы ЛЕМ.фм+ на ден 19. червця/юнія 2023 р.

Венецийска Комісия проанализувала украінскій меншыновый закон

Як подал в понедільок 12. червця/юнія порталь Европейска Правда, Венецийска Комісия опубликувала критичный результат по анализиі украіньского Закону о нацийональных меншынах, принятого Верховном Радом Украіны в грудни/децембрі минулого рока. Принятя закону было медже рекомендациями Европейской Комісиі при уділяню статусу кандидуючой державы. Венецийска Комісия, порадный орґан Рады Европы, анализувала го од лютого/фебруара. Фаховці привитали принятя закону, але єдночасно рекомендуют пробадати много установлінь, жебы были згідны з медженародныма стандардами. Векшына рекомендаций тыкат хоснуваня языка нацийональных меншын, Комісия м.ін. вызвала розшырити права робити подіі і інчы діла в меншыновых языках, і вышмарити повинніст тлумачыти вшытко на украіньскій язык. Рекомендациі тыкают такых квестий як выдаваня книжок в меншыновых языках, перекладу офіцияльных назв і інформаций, ци принятя методикы хоснуваня языків нацийональных меншын в урядах. Комісия хоче і ревізию дальшых законів, головно што до «ограничыня свободы хоснувати язык меншын і роздільного трактуваня меншыновых языків» і права до доступу до масмедий в языках меншын. Жадают і дальшого одложыня зміны освітньой системы, яка бы мала быти од высшых кляс уж лем в украіньскым языку. Більше на тоту тему чытайте в дописі на нашым портали.

В Італиі одпрезентуют антолоґію лемківской поезиі

В тым тыжни, в пятницю 23. червця/юнія в Польскым Інституті в Римі одбуде ся вечер, якій завершыт ХХ едицию фестівалю польской культуры CORSO POLONIA. Подія буде посвячена лемківскій меншыні. Першыраз в Італиі запрезентувана буде антолоґія лемківской поезиі під назвом «Ritorni / Powroty / Вертаня», єст то перше опрацуваня по італияньскы посвячене нашій літературі. На подіі будут присутны Сільвія Бруні, авторка опрацуваня книжкы і тлумачынь вершів, і проф. Олена Дуць-Файфер, авторка вступу до книжкы. Вечер прикрасит концерт Дариі Кузяк (спів, гушлі, електроніка) і Ольгы Стариньской (спів, ґітара). Одбуде ся і інавґурация фотоґрафічной выставы пн. «Лемкы. Повороты без одіздів» авторства Сімоны Оттоленґі і Роберто Ґабрієле. Початок о 19.00 год. Вступне дармо.

На тоты верне потяг Ясло – Крениця

Сезонове желізницьове получыня з Ясла до Крениці рушыт уж в тым тыжни. Włóczykij верне на торы в тоту суботу 24. червця/юнія. Першый тыжден, до 2. липця/юлия потяг буде ходил каждый ден, а пак, до 3. вересня/септембра, так як в минулых роках, в кажду суботу і неділю. Штоденны получыня были задуманы на любителів спорту, котры будут хотіти видіти в Креници змаганя в рамках Европейскых Ігр Краків – Малопольща 2023. Потяг буде выізджал з Ясла о год. 6.37, а зо стациі Ґорлиці Загіряны о 7.14, в Креници буде перед 10.00. Курс назад буде по 17.00 годині. В минулым році з вакацийных переіздів на трасі Ясло – Крениця скорыстало понад 3,5 тис. пасажерів.

Проєкция фільму про загыбаючый ґатунок в МНП

Маґурскій Нацийональный Парк просит на пятницю 30. червця/юнія до Едукацийно-Музейного Осердка в Крампній на показ фільму пн. «Когут», якого авторами сут Михал Адамович і Філіп Худзіньскій. Фільм єст результатом дволітніх досліджынь над татряньскыма тетеревами – птахами, котрых популяция в Польщы з ріжных причын вымерат. Місця іх прожываня мож іщы найти м.ін. в высокых горах.