Соймова Комісия Нацийональных і Етнічных Меншын в православній парохіі в Щеціні

В понедільок 29. мая в Рыцарскій Сали Воєвідского Уряду в Щеціні одбыло ся выіздове засіданя Соймовой Комісиі Нацийональных і Етнічных Меншын в західньопоморскым воєвідстві. Пак посланці візитували православну парохію св. Миколая в Щеціні.

Комісия на выіздовым засіданю занимала ся розсмотріньом інформациі Міністра Внутрішніх Справ і Адміністрациі на тему ситуациі і проблемів нацийональных і етнічных меншын жыючых на обшыри західньопоморского воєвідства та розсмотріньом інформациі Міністра Нацийональной Едукациі на тему едукацийной ситуациі і проблемів реченых меншын. В дискусиі голос мали і локальны лідеры нацийональных і етнічных меншын.

На засіданю СКНіЕМ были представникы меншын, тіж лемківской

Окрем членів Комісиі до участи в стрічы были запрошены представникы меншын, м.ін. грецкой, лемківской, украіньской, ромской, жыдівской і ормяньской. Лемківску меншыну репрезентувал на стрічы о. Павел Стефановскій, парох православной парохіі св. Миколая в Щеціні.

Присутны были і представникы Міністра Внутрішніх Справ і Адміністрациі, Міністра Нацийональной Едукациі, Полномічна Воєводы дс. нацийональных і етнічных меншын, Секретар Воєвідства – Директор Ґереральный Маршалківского Уряду, Директорка Выділу Социяльной Спілпрацы Уряду Міста і Полномічный Маршалка Воєвідства дс. Освіты.

Дальше одбыла ся стріча в православній парохіі в Щеціні

На просьбу членів Комісиі, уж по офіцияльным засіданю в Західньопоморскым Воєвідскым Уряді, одбыла ся стріча в православній парохіі в Щеціні. На стрічы были присутны і Полномічна Воєводы дс. нацийональных меншын в західньопоморскым воєвідстві та ведуча Стоваришыня Греків Західнього Поморя в Польщы Екатеріні Еванґелю.

Комісия доцінила поміч для біженців

Підчас стрічы была м.ін. порушена тема помочы біженцям з Украіны. Православна парохія св. Миколая в Щеціні орґанізувала поміч для біженів уж од першого дня войны. О. Павел Стефановскій был запрошеный Президентом Міста Пьотром Кшыстком до участи в робочій ґрупі дс. помочы біженцям в Щеціні. В будуваній плебаніі парохія одкрыла пункт помочы, будучый єдным зо штырьох авторизуваных властями міста.

О. Павел Стефановскій разом з імостю Ольгом і вольонтерами каждый ден принимали, одівали і кормили соткы потрібуючых. З помочом заграничных офіродавців спід церкви каждый ден рушали транспорты з найпотрібнійшым ґратьом. Парохія дотепер підтримує вельо родин біженців, котры рішыли остати в безпеці на польскій земли.

Вшыткы тоты діяня, долгы чергы біженців ждучых каждый ден під церквом, жебы отримати поміч, реґулярно документували державны і реґіональны медиі. На стрічы з посланцями были вказаны вытинкы з тых реляций.

Як повіла для медий ведуча Соймовой Комісиі Нацийональных і Етнічных Меншын, посланкыня Ванда Новіцка, «виділи, як на західнім Помори фурт Лемкы сильно сперают Украінців».

Порушена і лемківска тема

На стрічы в православній парохіі бесідувана была і ситуация лемківской меншыны в Польщы. Од стороны лемківскых представників выплынула м.ін. тема фурт зменшаных з рока на рік державных середків на підметове діяня лемківскых орґанізаций і недостаточного фінансуваня задач, котры мают на цілю сохраніня і промоцию лемківского языка і лемківской культуры. Лемкы передали Комісиі і підкрислили потребу основаня Лемківского Інституту.

О вызнаня як нацийональну меншыну фурт старают ся Грекы

Продолжана была і барз важна тема піднята перше на засіданю ведучом Стоваришыня Греків Західнього Поморя в Щеціні Екатеріні Еванґелю. Ведуча Заряду ELLAS PAREA порушыла квестию зголошуваной грецком меншыном конечности запису в уставі нацийональных і етнічных меншын, же грецка меншына єст нацийональном меншыном.

Як подала ведуча комісиі Барбара Новіцка, комісия вельократно зголошувала проєкты устав тыкаючы нацийональных і етнічных меншын, в тым вызнаня грецкой меншыны за нацийональну меншыну, але не дождали ся они дальшого процедуваня. Ведуча выразила надію, же нововыбраный Сойм РП буде барже прихыльный до розвязуваня текучых справ тыкаючых нацийональных і етнічных меншын.

Меншыны рады з добрых односин з Полномічном Воєводы

Посланці мали на стрічы нагоду попрібувати кухню локальных меншын, м.ін. лемківску кєселицю, украінскє сало, ґрузінскы пхалі і грецкы кіста. Меншыны в часі обох стріч, і на офіцийным засіданю в Воєвідскым Уряді, і на меньше формальній стрічы в православній парохіі, дякували за підтримку Полномічной Воєводы Нелі Копаньскій за великє заанґажуваня і взірцьову спілпрацу. Полномічна одповіла подяком для представників меншын, стверджаючы, же од них найвеце ся навчыла в протягу свойой долголітньой працы на тым становиску.

Джерела фотоґрафій: фейсбуковый сайт Jarosław Rzepa poseł IX kadencji na Sejm RP, Ольга Стефановска, о. Павел Стефановскій.