Сумар дня на 7. червця/юнія 2023 р.

Приносиме вам сумар медияльной ґрупы ЛЕМ.фм+ на ден 7. червця/юнія 2023 р.

Поступуют роботы в Ґалдышові – церков росне!

Вчера, то є в віторок 6. червця/юнія на пляц будовы православной церкви в Ґладышові приіхал выконавця, жебы зачати черговый етап будовы. Як подал нашій редакциі парох о. прот. Ярослав Ґрич, вчера зачали докладати стіны в олтари та возносити нижню част зрубовой ломленой бані над олтарьом і храмом вірных, до того етапу необхідный буде двигар. На тот сезон плянуване єст докінчыня цілого даху, включні з банями, не мож єднак на тым етапі ствердити, коли то буде. Парох Ґрич надіє ся, што буде то конец липця/юлия. Нова православна церков в Ґладышові возношена є на взір неістнуючой церкви в Незнайовій, котру специялисты окрисляют як єден з найкрасшых примірів лемківской сакральной архітектуры. Фурт іщы можеме підперти тото великє діло, якым є все будова нового храму – жертвы на будову церкви мож вплачати на окремый номер конта. Окрем того парохія Рождества Йоана Крестителя в Ґладышові продає ділянку в Устю Рускым – дохід переданый буде на потребы звязаны з будовом стявыні. Оголошыня о продажы ділянкы найдете на сайті investdom.gorlice.pl.

Нацийональне русиньскє свято на Словациі

В найблизшу неділю 11. червця/юнія празднуваный буде Ден Русинів Словациі. Головны святкуваня нацийонального свята пройдут в Свиднику. Проґрам зачынают два богослужыня – о 9.00 год. правлена буде православна літургія, пак о 10.30 грекокатолицка, дальше по пєтным акті і панахіді при гробі будителя Александра Павловича торжествуючы і ансамблі перейдут походом до місця ґаля-концерту, котрый зачне ся о 14.00 год. Орґанізатором подіі є Русиньска Оброда на Словациі. Локальні святкувати будут тіж в Меджелабірцях, але ден перше, в суботу 10. червця/юнія – в амфітеатрі культурный проґрам зачне ся од 14.30 год., а в неділю святкуваня продолжаны будут в Тополи, де народил ся Александер Духнович і де находит ся пропамятна таблиця в чест будителя. Закінчыньом святкувань буде шторічный декляматорскій конкурс Духновичів Пряшів, котрый пройде в понедільок 12. червця/юнія в русиньскым театрі в Пряшові.

Одкрытя літньой школы уж в неділю

В найблизшу неділю пройде іщы єдна русиньска подія – в Пряшові о 18.00 год. одбуде ся святочне одкрытя Studium Carpatho-Ruthenorum 2023, значыт 11. едициі Медженародной Літньой Школы Русиньского Языка і Культуры, в рамках котрой через три тыжні школяре з ріжных держав світа познают основы русиньского языка (кєд іде о заграничных участників), нашу історию, літературу, выбраны елементы культуры, в проґрамі сут і выіздовы прогулькы, тіж на Лемковину. Занятя ведены сут по анґлицкы і по русиньскы.

Спілпраца в рамках Карпатского Реґіону

В минулу пятницю 2. червця/юнія в Саноку прошол семінар посвяченый 30-літю польской і словацкой публичной статистикы в рамках Карпатского Реґіону. Еврореґіон покликано в 1993 році і одраз зачала ся спілпраца статистичных урядів. Головном частю семінара была дебата з участю презесів: Головного Статистичного Уряду в Варшаві Домініка Розкрута та Статистичного Уряду Словацкой Республикы Петера Петько. Присутны были і власти з самоурядів, што входят в склад Карпатского Еврореґіону.

Хто остане арендарьом колибы в Бортным?

Заряд ґорлицкого одділіня Польского Туристично-Краєзнавчого Товариства глядат охочых арендувати туристичну колибу в Бортным в терміні од 1. вересня/септембра тр. Заінтересуваны арендом мусят мати досвідчыня в ведіню господарчой діяльности, а тіж мати зареґіструвану господарчу діяльніст. Будучый ґазда обєкту мусит мати тіж фінансове забезпечыня на кошты звязаны з арендом і фунґуваньом колибы. Заінтересуваны прошены сут зложыти своі оферты в бюрі ґорлицкого одділіня Польского Туристично-Краєзнавчого Товариства особисто, майльово або листовні в терміні до 15. липця/юлия.

Фот. ФБ-профіль Dzieło budowy cerkwi prawosławnej w Gładyszowie