Штефан Дудра професором соспільных наук

Рішыньом Президента Польской Республикы Анджея Дуды з дня 8. мая 2023 р., др габ. Штефан Дудра отримал званя професора соспільных наук в обшыри наукы о політиці і адміністрациі.

Проф. Дудра наштоден єст директором Інстиуту Наук о Політиці і Адміністрациі Зеленогірского Університету. В 2014 р. был призначеный на посаду єдного з двох представників лемківской меншыны в Спільній Комісиі Уряду та Нацийональных і Етнічных Меншын.

В своій дотеперішній працы занимал ся м.ін. нацийональном і реліґійном політиком Польщы по ІІ світовій войні, тіж в однесіню до лемківской етнічной меншыны.

Лемкo, якій ял ся темы свойой соспільности

Штефан Дудра вродил ся в 1964 р. в Шпротаві (Нижній Шлеск) в родині выселенців з Лемковины. По завершыню середньой школы зачал студиювати в Інституті Істориі Высшой Педаґочічной Школы в Зеленій Горі.

Як член меншыны, котра в рамках акциі «Вісла» нашла ся насильно далеко од свойой землі, такой од початку свойой науковой карєры зосереджал на досліджаню темы долі лемківскых выселенців. Докторат на основі дисертациі «Лемкы на Середнім Надодрі в роках 1947-1990» оборонил на Гуманістичным Выділі в 1996 р.

В 2014 р. был покликаный на функцию члена Спільной Комісиі Уряду та Нацийональных і Етнічных Меншын, де доднес засідат як репрезентант лемківской меншыны.

Науковый доробок

Новый бельведерскій професор своі історичны досліджыня зосереджат головно коло двох тем. Перша з них – спомнена горі – близка за справом лемківского походжыня, а друга – тіж близка за справом реліґійной достоменности – то як раз проблематика православя в Польщы, в тым Польской Автокефальной Православной Цекрви. В 2005 р. на основі загального наукового доробку і предложеной габілітацийной працы пн. «Православна церков на західніх і пілнічных землях Польщы по ІІ світовій войні» отримал званя доктора габілітуваного на своій Альма Матер.

В роках 2006-2019 полнил функцию кєрівника Закладу Медженародных Односин в Інституті Політолоґіі ЗУ та заступці директора того же Інституту (2008-2012). Од 2008 р. робит в Інституті Політолоґіі ЗУ на посаді університетского професора.

В 2009 р. зачал вести Працовню Досліджынь над Нацийональныма і Етнічныма Меншынами, а од 2019 р. полнилт фунцкию директора Інституту Наук о Політиці і Адміністрациі та проводити Раді Дисциплины Наук о Політиці і Адміністрациі.

Професор Дудра є автором 8 моноґрафій, науковым редактором парусот книжок та автором і спілавтором більше як 200 статій і розділів в ґруповых моноґрафіях. Є шефредактором часопису «Przegląd Narodowościowy-Review of Nationalities» і спілредактором «Річника Православной Вроцлaвско-Щеціньской Єпархіі».

Спід своіх крыл выпустил більше як 300 маґістрів. Был промотором в шестьох успішно завершеных докторскых путях.

Засідат в Комітеті Політичных Наук Польской Академіі Наук, єст членом науковой рады і заряду Swedish Institute for Strategic Studies and Academic Research в Штокгольмі. Штефан Дудра робит як експерт до справ лемківской меншыны при проєкті «О нас вартат, вартат з нами», якій є реализуваный Жыдівскым Стоваришыньом Чулент во спілпрацы з польско-украіньском Фундацийом Зустріч і Фундацийом Jaw Dikh.