Сумар дня на 30. мая 2023 р.

Приносиме вам сумар медияльной ґрупы ЛЕМ.фм+ на ден 30. мая 2023 р.

Споминова подія Віденьского Синоду Грекокатолицкых Єпископів

Як поінформувал Пресовый Центр Кошыцкой Єпархіі, з нагоды 250. річниці Віденьского Синоду Грекокатолицкых Єпископів угорской части Габсбуржской Монархіі пройдут упамятняючы торжества та конференция грекокатолицкых єпископів середньой Европы. Подія одкрыта днес Акафистом до Пресвятой Богородиці тырвала буде до 1. червця/юнія. В середу пройде конференция, в рамках котрой бесідуваны будут темы тыкаючы давных і теперішніх душпастырскых вызвань, як і зміцніня ролі католицкой церкви в середній Европі. Споминова подія закінчыт ся 1. червця/юнія стрічом грекокатолицкых єпископів, котры продискутуют внутрішні справы церкви. Того самого дня одслужена буде літургія при участи вшыткых єпископів, в часі котрой одкрыют новый душпастырскій центр про мадярскых грекокатоликів в Австриі.

Ґміна Лютовиска просит о поміч при модернізациі церкви в Кривым

Ґміна Лютовиска одкрыла колекту на ратуваня церкви св. Параскєвы в Кривым в Бєщадах. Іщы сто років тому в селі Криве прожывало близко 500 жытелів, днес о його істнуваню припоминают уж лем знищена святыня і дзвінниця, котры вымагают скорой модернізациі. Грекокатолицка церков з 1842 рока єст єдном з трьох побудуваных на вершку Ділок. До днес лишыла ся лем конструкция стін святыні, додатково в тым році єдно з дерев, котры обросли церков, ушкодило дзвінницю. Оба будинкы сут вписаны до ґмінного реґістру забытків, єднак ґміна не має грошів на консервацию обєктів. Проблемом єст тіж брак документациі дзвінниці. З той причыны власти ґміны глядают фінансовой підпоры, котра споможе іх в ремонті забытків. Як підкрислил єден з радных ґміны, при того рода старанях о дофінансуваня треба ся рахувати зо жданьом на рішыня, а вельо часу не має дзвінниця, котру треба выремонтувати іщы перед першыма морозами, інакше може не дотырвати до наступной яри.

Онедолга до Долины Попраду вернут потягы

Добра новина для подорожуючых, од 15. червця/юнія на желізницьову ленію но. 96 Тарнів-Лелюхів вертают потягы. Через остатні три місяці в Долині Попраду ведена была модернізация леніі, в рамках котрой м.ін. вымінили деревяны підкляды на бетоновы на трасі од Пивничной через Верхомлю до Зубрика. В тым часі подорожуючы корыстали з заступчой комунікациі. О два тыжні вернут потягы, а разом з нима зміны в розкладі. Як передал член Новосандецкого Стоваришыня Любителів Желізниці, до розкладу верне вікендове получыня медженародного потягу Попрад Татры-Мушына, в вакацийным періоді курсувал буде тіж популярный серед туристів потяг «Włóczykij» реляциі Крениця-Ясло.

Єдина така нагода до стрічы з проф. Павлом Робертом Маґочійом

Початком червця/юнія пройдут дві авторскы стрічы з проф. Павлом Робертом Маґочійом, автором публикациі «Pod osłoną gór. Dzieje Rusi Karpackiej i Karpatorusinów». Перша стріча пройде 6. червця/юнія о 18.00 год. в Інституті Істориі Штукы Вроцлавского Університету. Друга орґанізувана єст Стоваришыньом Лемків 7. червця/юнія в Collegium Witelona в Ліґници і зачне ся о год. 16.30. Припоминаме, што по другій стрічы пройдут консультациі в справі вписаня на Державный Спис Нематерияльной Культурной Спадковины лемківского языка і лемківской культуры. Сут они одкрыты для вшыткых Лемків, котры ідентифікуют ся з лемківскым языком і лемківском культуром.