«Бесіда» – май/червец

Третій тогорічный номер двомісячника Стоваришыня Лемків – «Бесіда», ч. 3 (192) за місяці май/червец 2023 р. – вышол уж з друку і доступный є до придбаня.

В найсвіжшым номері часопису прочытаме м.ін. статі:

• Наталия Малецка-Новак, Никыфор, церкви, Акция «Вісла» – темы з Лемками ідут як вода…;
• Севериян Косовскій, Книгы, што были приречены на загыбель;
• Демко Трохановскій, Загальне зобраня членів Руской Бурсы в Ґорлицях;
• Севериян Косовскій, Анна Горощак радном Містецкой Рады в Хоцянові;
• Петро Трохановскій, Тридцет років лемківскых альманахів (2);
• Севериян Косовскій, Вмер Димитрий Русинко (1941–2023), єден з основателів Стоваришыня Лемків;
• Павел Коробчак, Вроцлавскы студенты на практиці в Пряшові;
• Петро Трохановскій, Штефан Шкымба (1895-1966);
• Петро Медвідь, Вмер Іван Бровді.

Традицийно часопис одкрыват част «Новины, не новины – не лем з Лемковины», де поміщено спис найважнійшых подій за період двох остатніх місяців.

Дальше публикуваны сут польскоязычны і словацкы тексты тыкаючы темы Русинів. Цікавым являт ся текст передрукуваный з ґазеты «Tygodnik Powszechny», якій односит ся до американьскых платен з лемківскыма піснями, початку ХХ ст. При темі можеме собі припомнути тіж особу Штефана Шкымбы, еміґрацийного діяча і як раз выдавці лемківскых цедечок – на тамтот час барз модерного чловека.

Редактор выданя продолжат тему лемківскых альманахів – значыт «Лемківскых Календарів», пак названых «Лемківскыма Річниками», котры выдає каждый рік Стоваришыня Лемків. Петро Трохановскій описал вшыткы дотеперішні чысла, включно з остатанім за 2022 р.

Єст дашто і для духа. Почытате вершы, але тіж прозу од Владиміря Хыляка.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 9.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.