Сумар дня на 24. мая 2023 р.

Приносиме вам сумар медияльной ґрупы ЛЕМ.фм+ на ден 24. мая 2023 р.

Юлия Донша з «Оскаром»

Юлия Дошна остала лавреатком престіжной нагороды IGF Gold Star, называной «Оскаром фольклору». Піснярку доцінили м.ін. за ціліст артистичной діяльности. Вручыня нагорід прошло 6. мая тр. в Сату Маре в Румуніі на ґали IGF Gold Star. Світова Федерация Фольклору, World Folklore Union I.G.F., рішыла доцінити артистку за єй вклад в промуваня лемківской культуровой спадковины. В поясніню нагороды чытаме, што признана была «за ціліст артистичной діяльности, підпераня, баданя і промуваня на державным і медженародным рівни вартости традицийной культуры». «Оскары» трафили тіж в рукы артистів і популяризаторів фольклору з Румуніі, Іспаніі, Литвы, Ізраіля, Італиі і Кіпру. Юлиі Дошні сердечні ґратулюєме «Оскара»!

Проблем для мешканців східньой Лемковины

Мешканці м.ін. ґмін Команча ци Яслиска не квестийонуют потребы охороны селиск птахів, але не достерігают місця в проєкті для себе, подля них то нова версия Натура 2000. Іде о Плян Охоронных Задач зрыхтуваный з рекомендациі Реґіональной Дирекциі Охороны Середовиска в Ряшові. Новы переписы обняти бы мали аж 21 ґмін, іж жытелі не хотят, жебы обняты были нима терены, якы безпосередньо прилігают до воєвідскых, повітовых і ґмінных доріг, з вылучыньом тых забудуваных або в будові. Мешканці скаржат ся, што подля новых переписів не будут мочы будувати на своіх ділянках, ани хоснувати свого поля під управу. Подля самоурядовців новый проєкт охороны середовиска нарушат соспільный інтерес, ограничат можніст розвитку місцевых люди. Власти ґмін Команча і Яслиска постулюют, жебы не обнимати Пляном Охоронных Задач теренів в оддаліню до 100 метрів од доріг, кєд тото не поможе – заповідают активне протестуваня в Ряшові і/або в Варшаві.

Презентациі русиньскых выдань

В наступным тыжни в Войводині пройдут дві подіі, на котрых презентувати будут русиньскы книжкы. В віторок 30. мая в Новым Саді одбуде ся презентация книжкы «Зоз поштаровей торби», котрой автором є Дюра Салонтай. Публикация є збірком гуморесок бывшого русиньского почтаря. На презентациі буде представлена і лавреатка за карикатуру в конкурсі «Коцурска чутка 2022», орґанізаторы обіцюют для присутных і безплатны примірникы презентуваной книжкы. Зас 8. червця/юнія во Вербасі пройде презентация двох капітальных творів русиньской лексикоґрафіі – правопису з правописным словником авторства Михайла Фейсы і Гелены Медєші, та анґлицко-русиньского словника, якій зрыхтували Михайло Фейса, Маріна Шлемендер і Славіца Чельовскі. На подіі презентувана буде тіж публикация «Мала істория Русинів», книжка Івана Попа, котру в минулым році выдали і в бачваньскым стандарді русиньского языка.

Русины Хорвациі будут святкувати!

В будучу суботу своє нацийональне свято празднувати будут не лем Русины жыючы на Мадярах (припоминаме, што подіі Дня Русинів Мадяр пройдут в Марияповчы, орґанізує іх Вседержавне Русиньскє Самосправуваня), але і Русины Хорватской Республикы. Союз Русинів Хорватской Республикы та Рада Русиньской Нацийональной Меншыны Вуковарско-Сримской Жупаніі просят на Святочну Академію, котра одбуде ся в Хорватскым Домі Вуковар. Попередят єй зложыня квітя під Крестом на вплыві Вукы до Дунаю та одкрытя выставы «Мистецтво деревяной різбы».