В Новім Саді і Вербасі одпрезентують русиньскы книжкы

Як інформовав Михайло Фейса, председа орґанізації Руска матка, у Войводині суть напланованы дві події, на якых будуть ся презентовати русиньскы книжкы, котры там были выданы.

У віторок 30-го мая одбуде ся презентація книжкы Зоз поштаровей торби, котрой автором є Дюра Салонтай. Подія буде проходити у Выдавательскім домі Прометей. Якраз тото выдавництво выдало книжку нашого автора. Публікація є збірков гуморесок бывшого русиньского поштаря.

На події будуть участны і бывшы колеґове автора, новосадьскы поштарі, вдяка чому буде нагода спознати роботу поштарів у Новім Саді в другій половині 20-го столітя, коли поштарі мали безпосередный контакт з людми.

На презентації буде представлена і лавреатка за карікатуру на конкурзі Коцурска чутка 2022, а орґанізаторы обіцяють і безплатны фалаткы презентованой книжкы про участных.

У четверь 8-го юна одбуде ся у Публічній бібліотеці Данило Киш у Вербасі презентація двох капіталных творів русинькой лексікоґрафії, і то правопису з правописным словником од Михайла Фейсы і Гелены Медєші, а анґліцько-русиньского словника, якый быв приготовленый Михайлом Фейсом, Марінов Шлемендер і Славіцов Чельовскі.

У Вербасі участным буде представлена і Мала історія Русинів, книжкы Івана Попа, котра была в минувшім році выдана і у бачваньскім штандарді русиньского языка.

Презентація у Вербасі орґанізує ся при нагоді сторічніці публікованя першой ґраматікы русиньского языка під назвов Граматика бачваньско-рускей бешеди, котрой автором є Гавриїл Костельник, і 110-ой річніці од народжіня Гавриїла Г. Надя, наслідника автора першой ґраматікы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА