На граді Любовня будуть реконштруовати далшы обєкты

Як інформовало Одділіня комунікації Пряшівского самосправного краю, град Любовня перейде далшов реконштрукційов. Тота дотулять ся северовыходной стіны і третього двора.

Народна културна памятка, котра находить ся над містом Стара Любовня, здобыла на проєкт обновы фінанчны средствва з Міністерства културы Словацькой републікы, а так само од свого зряджователя Пряшівского самосправного краю (ПСК), кедьже обєкт належыть Любовняньскому музею.

Сума цілковых вытрат на далшу фазу реконштрукчных робот представлює 1,217 міліона евр. Проєкт на северовыходну стіну і третій двор народной културной памяткы – граду Любовня, здобыв на реконштрукцію грошы з вызвы резорту културы Обновме собі свій дім 2023, з котрой прийде на ставебны роботы 650 тісяч евр.

ПСК дасть до проєкту комплексной реконштрукції цілково 567 500 евр. Співфінанцованя і дофінанцованя проєкту, котрый окрім іншого сохранить воєньскы касарні із 17-го столітя, схвалили посланці Заступительства ПСК в понедільок 15-го мая 2023-го року на своїм засіданю.

Северовыходна стіна є теперь в гаварійнім стані, што ся вырішыть реконштрукчныма роботами. Проєкт так само уможнить одпрезентовати історічны касарні і археолоґічну локаліту формов постоянной експозіції з выхоснованьом модерных технолоґій. Проєкт поможе і з презентаційов старой студні, респектівно цістерны, котра ся в данім обєкті находить, а так само ся цілково скултівує третій двор граду.

По закінчіню реконштрукчных робот будуть обновлены памяткы сприступнены навщівникам граду Любовня.

Любовняньскый музей – град Любовня належыть меджі найнавщівльованішы културны орґанізації ПСК. Середнє чісло навщівности за рік є приблизно 200 тісяч людей. Реконштрукція і сприступніня далшых обєктів граду так само має помочі ку іщі векшому інтересу турістів о тоту перлу на северовыході Словакії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА