Tымчасовый міст на трасі до Крениці є праві готовый. Старый в цілости перебудуют

Кінчат роботы при будові тымчасового мосту над потоком Камяна в селі Поляны в ґміні Крениця. Як підкрислят бургомайстер курорту Пьотр Рыба, то стратеґічный елемент інфраструктуры, бо обслугує туристичный рух в підкарпатскым, люблиньскым, підляшскым, а по части і мазовєцкым та свєнтокшыскым воєвідствах. Очывидно дорогу хоснуют і туристы з Малопольщы.

Найпевнійше іщы того рока скінчат будувати новый міст на воєвідскій дорозі но 981. Жебы мож было заняти ся старым мостом, необхідным было побудувати тымчасовый перехід.

Конструкция нового мосту буде мала два пасы по 3,5 м каждый. Будут пішникы шырокости 2 м, а цілковита долгіст мосту вынесе 24 м, при шырокости 13,3 м. В рамках інвестициі зроблят тіж зміцніня убочы потока Камяна.

До конкурсу оферт розобрати старый і вознести новый міст, што был зорґанізуваный Зарядом Воєвідскых Доріг в Кракові, зголосило ся аж 17 фірм. Найтуньшом вказала ся фірма з Нового Санча – Будівництво Мосты Дорогы БМД. Роботу выцінили на 5,75 млн зл. Найдорожшом пропозицийом была оферта з выціном на аж 10,3 млн зл. Догваріня з новосандецком компанійом підписали 8. марця тр.

Заряд Воєвідскых Доріг в Кракові зрыхтувал на тото замовліня 8 млн зл. Вшыткы фірмы оферували тіж 84 місяці ґаранциі зреализуваной роботы. Выконавця має 9 місяців, жебы зреализувати інвестицию, а роботы мают скінчыти ся до половины грудня/децембра тр.