Сумар дня на 8. мая 2023 р.

Приносиме вам сумар медияльной ґрупы ЛЕМ.фм+ на ден 8. мая 2023 р.

Поможме Наталиі станути на ногы!

В неділю 30. квітня/апріля на державній дорозі нр 8 в Радзікові на Нижнім Шлеску дошло до выпадку – автомобільной катастрофы. Потерпіли в ним о. ігумен Спіридон і Наталия Цьолка, якы вертали з Літургіі в Зубковицях Нижніх. Наталия, яка сідила на місци пасажера, была сильно зранена. Перетранспортувана гелікоптером LPR до вроцлавского шпыталя перешла тяжку, вельогодинну операцию. Жебы помочы Наталиі в вертаню до здоровля і справности, на сайті zrzutka.pl ведена єст колекта на єй лічыня і регабілітацию. Колекту пн. «Поможме Наталиі станути на ногы!» одкрыла Православна Парохія Успіня Пресвятой Богородиці в Лугах, яка окрем фінансового спертя просит споминати в своіх молитвах потерпілых о. ігумена Спіридона і Наталию.

Публикациі про Никыфора номінуваны в конкурсі Найкрасшы Польскы Книжкы 2022

Дві публикациі, якых тема є посвячена єдному з найвыдатнійшых лемківскых артистів, бодай найславнійшому во світі представникови наівной штукы Епіфанови Дровнякови (Никыфорови), нашли ся серед книжок номінуваных в конкурсі Найкрасшы Польскы Книжкы 2022. Перша з номінуваных книжок про творчіст Никыфора была номінувана в катеґориі «Штука і фотоґрафія (алюбомы і каталоґы)». То близко тристастраницьовый альбом пн. «Маляр над малярями», печатаный в минулым році Нацийональным Етноґрафічным Музейом в Варшаві. Окрем 137 творів Дровняка в альбомі находят ся і повекшыня дакотрых деталів, такых як сиґнатуры, печаткы ци допискы автора. Окрем ілюстрацийной части в публикациі помістили і опрацуваня тыкаючы особы і феномену Никыфора та істориі збіркы його робіт триманой в Нацийональным Етноґрафічным Музею во Варшаві. Другом з книжок про Дровняка номінуваном в конкурсі в катеґориі «Книжкы для діти і молодежы» єст публикация Мариі Стшелецкой пн. «Никыфор». То богато ілюструвана біоґрафія печатана Выдавництвом Libra PL. Торжество вручаня нагорід і выріжнінь тогорічной едициі пройде 25. мая вчас Медженародных Торгів Книжок в Варшаві.

«Юрий Новосільскій. Варшава і Мазовше»

Як поінформувал Уряд Району Влохы столичного міста Варшавы, в днях од 4. до 31. мая тр. просят до Выпожычальні нр 28 на едукацийну выставу посвячену мазовєцкій сакральній творчости Юрия Новосільского – выдатного лемківского маляря, рисовника, теоретика штукы і православного теолоґа, єдного з найвызначнійшых сучасных іконописців. Выставу пн. «Юрий Новосільскій. Варшава і Мазовше» мож звиджати дармо до кінця того місяця в годинах працы Выпожычальні. Експозиция была зреализувана Публичном Бібліотеком в Районі Весола міста Варшавы при фінансовым спертю столичного міста Варшавы.

Празднуваня 10. річниці істнуваня Обчаньского Здружыня Колысочка

Припоминаме, што в тым тыжни, в пятницю – 12. мая, на великій сцені Театру А. Духновича в Пряшові одбудут ся празднуваня 10. річниці істнуваня Обчаньского Здружыня Колысочка. Тота русиньска орґанізация м.ін. орґанізує вечерні школы русиньского языка для діти і дорослых, печатат книжкы і підручникы, платні та часопис для русиньскых діти пн. «Колысочка». В проґрамі святочной подіі сут м.ін. выступы учеників русиньского языка, співочы выступы Ганкы Сервіцкой і Мариянны Железной та презентация діяльности орґанізациі за рокы єй фунґуваня.