«Слово» – Неділя розслабленого – неділя, 9.00 год.

Пержываме радостный час Пасхы. Далшов недільов того часу є Неділя розслабленого. Дайме собі тот вопрос, яке одношіня мать днешня неділя ку празднику Пасхы? Бо євангеліє нам росповідать о діалоґу Ісуса з чоловіком, котрый довгы рокы перебывав у вівчій купальні.

Там одбывало ся велике чудесно діло. Бо Ангел Господній сходив на часы і колотив воды. А хто першый зышов до воды, набывав здравя. А быв там чоловік, котрый довгы рокы быв невладный. Ісус ся звідує: Хочеш быти здравый? Тот одповів: Хочу, но не мам чоловіка, котрый бы ня зніс до воды, кедь ся сколотить. А покы я там зыйду, та іншый мене спередить. Тогды йому Ісус повів: Встань, возьмий свою постіль а ідь. А тот чоловік такой встав, взяв свою постіль а ішов.

По часі його Ісус нашов у храмі і говорить йому: Смоть, ты здравый, не гріш веце, жебы ся з тобов не стало дашто гірше. Тыма словами його Ісус напоминать, же є і дашто гірше од той хвороты, котру мав так довго. А то вічне трапліня в аді.

Ісус пришов воскресити чоловіка ку новому жывоту. Хоць в якім ставі гріха бы ся находив. Каждый може прийти а прияти одпущіня в тайні покаяня. Но Ісус напоминать. Не вертай ся назад до старого гріха, жебы момент смерти не надышов в такім розположіню. Бо тогды чоловіка чекать дашто гірше. Дашто страшніше.

Ісус пришов заперти ад а отворити небо. Но чоловік може рішіньом свойой волі знову отворити про себе мукы аду і заперти небо. А так тоты слова Ісус адресує і нам. Прияли сьме здравя Воскресіньом Хріста про нашу душу. Дав новый жывот. Смертію смерть поправ…

Жыйме тогды тым новым жывотом, невертайме ся до рабства гріха, жебы ся з нами не стало дашто гірше. Хрістос воскрес!

В неділю, 7. мая 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. мая 2023 р. о 12.00 год. і 8. мая 2023 р. о 2.00 год. за русиньскым часом.