Сумар дня 27. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 27. квітня/апріля 2023 р.

ІІ Краківска Ґенеалоґічна Конференция

О місяц в Кракові, в днях од 25. до 26. мая, одбуде ся ІІ Краківска Ґенеалоґічна Конференция – ”Ґалиция – дідовизна монархіі Габсбурґів в перспективі ґенеалоґічных бадань”. Спілорґанізаторами тогорічной подіі сут Нацийональный Архів в Кракові і Жыдівскій Музей Ґалиция. Головном темом конференциі буде шыроко пониманый терен давного Королівства Ґалициі і Льодомериі. Першый ден конференциі, выкладова част, пройде в Нацийональным Архіві в Кракові. Цілю прелекций буде представліня специфікы ведіня ґенеалоґічных досліджынь і захованя знаня о предках походячых з Ґалициі. Выклады будут поділены на 3 панелі. В другым панели пн. ”вельокультуровіст” заплянуваный єст і выклад на лемківску тему. З прелекцийом пн. ”Документацийна дідовизна до істориі Лемків і Лемковины – єй значыня і дослідничый потенциял” выступит др габ. Анна Крохмаль з Начальной Дирекциі Державных Архівів. Другій ден конференциі буде варштатовый, пройде в Жыдівскым Музею Ґалиция в Кракові. Варштаты будут м.ін про хоснуваня джерел в досліджаню предків з Ґалициі, ци ґеоінформатичне і картоґрафічне спертя ґенеалоґічных бадань.

Лемківскє Літо 2023

В суботу 10. червця/юнія в Чмельові на Нижнім Шлеску одбудут ся дни лемківской культуры ”Лемківскє Літо 2023”. Орґанізатором подіі єст православна парохія Св. Тройці в Любіні. Лемківскє Літо буде проходило на Рекреацийно-Спортовым Пляци в Чмельові в год. од 14:00 до 22:00. В проґрамі сут м.ін. гры і спортовы забавы, концерты, выступы наймолодшых, конкуры, і вельо інчых атракций. Буде мож і скоштувати реґіональны лемківскы стравы ци взяти участ в варштатах народного ремесла. Подія єст дофінансувана з середків Міністра Культуры і Нацийональной Спадковины з Фонду Промоциі Культуры.

Будова водного парку забав на Парковій Горі

Аж в липци/юлию рушат працы при будові водного парку забав на Парковій Горі в Креници. Інвестиция має уж выбраного выконавцю, а за будову цілости самоуряд заплатит 6 млн 900 тис. злотых. Будова рушыт аж літом, жебы не колідувала з ІІІ Европейскыма Іграми Краків-Малопольща, якы будут проходити в днях од 26. червця/юнія до 2. липця/юлия тр. Будинок водного парку має ся находити безпосередньо при пляци біциґльовых торів, де ся одбудут змаганя в гірскых біциґльовых спортах.

Зимовы обставины в высшых партиях гір

Татряньскій Нацийональный Парк припоминат, што мимо яри, яка панує на ниже положеных шляках, выже в горах пануют барз тяжкы, зимовы обставины. Порушаня ся в такых условіях в высшых партиях гір вымагат великого досвідчыня в зимовій туристиці і знаня оцінити локальну лявінову загорозу. Треба тіж мати одповіднє ґратя – ракы (не рачкы), чекан, каск та лявінове АВС знати го хоснувати.

Тырват технічный перегляд гірскых колейок

Од суботы зас буде мож віхати на Креницку Яворину хоснуючы ґондольову колейку. Заран завершыт ся там весняный перегляд. Технічна перерва єст циклична, по зимовым і літнім сезоні. Єст конечна, жебы в сезоні мож было іздити безпечні. Провіряны сут вшыткы елементы колейкы – електронічны і механічны. Заран так само завершыт ся технічный перегляд желізниці на Паркову Гору в Креници. Іщы до суботы на обі горы мож войти лем піше.