Сумар дня 24. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 24. квітня/апріля 2023 р.

Симпозий присвяченый 220. річници народжыня русиньского будителя Александра Духновича

В суботу 22. квітня/апріля в ужгородскым Центрі Культур Нацийональных Меншын Закарпатя одбыл ся симпозий, котрый был присвяченый 220. річници народжыня русиньского будителя Александра Духновича. Орґанізаторами подіі были м.ін. Центр Культур Нацийональных Меншын Закарпатя, Русиньскій Культуролоґічный Клюб, Закарпатскє Областне Науково-Культуролоґічне Общество Імени Александра Духновича і Народна Рада Русинів Закарпатя. На подіі з рефератами выступили многы науковці. Выповіди тыкали м.ін. формуваня реліґійной і нацийональной ідентичности Александра Духновича, його творчости, науковой і літературной дідовизны. На кінци подіі Володимір Фенич прочытал проєкт резолюциі, в котрій ся споминат, же Духнович вошов до істориі як нацийональный будитель карпаторусиньского народа. Деталі чытайте в дописі на нашым портали.

СКУтНіЕМ бесідувало про стан лемківскых забытків

В середу 19. квітня/апріля прошло перше в тым році засіданя Спільной Комісиі Уряду та Нацийональных і Етнічных Меншын. Бесідуваный был м.ін проблем формальной едукациі нацийональных і етнічных меншын. Єдным з пунктів стрічы была і презентация стану забытків лемківской материяльной культуры на Лемковині. Дискутували і про принципы фунґуваня електронного систему уділяня дотаций. Спілведучый засіданя, віцеміністер Блажей Побожый спомнул, што під конец марця в Польщы гостила делеґация Комітету Експертів дс. Европейской карты реґіональных або меншыновых языків. Цілю візиты было оцінити поступы Польщы в охороні і промоциі реґіональных і меншыновых языків. Комітет оцінил выбір постанов як амбітный, кєд же Польща зобовязала ся реализувати такы самы середкы для аж 15 языків. Іщы в тым році Комітет опубликує справопис і рекомендациі для дальшых діянь.

Православны Лемкы вознесли святочны молитвы на Св. Горі Явір

В минулый віторок, в третій ден Пасхы, православны Лемкы разом з владыком Паісийом, архієпископом перемышльско-ґорлицкым і єпархіяльным духовенством вознесли пасхальну молитву на Святій Горі Явір. По завершеній Літургіі владыка подякувал духовным і вірным за любов до того святого місця. Архієпископ Паісий спомнул і, што приступуют до выконаня архітектонічной концепциі церкви, яка стане на Святій Горі Явір.

Фурт мож складати внескы о нагороду ім. Владислава Оркана

Як подало Малопольскє Воєвідство, до 10. мая тр. любителі танця, фольклору і реґіональных традиций можут складати внескы о нагороду за выдатны осягніня в обшыри артистичной і культуральной діяльности локальных спільнот Малопольщы. Нагорода ім. Владислава Оркана має на ціли сперти артистичны середовиска, якы діют в обшыри традицийной реґіональной культуры: промуют реґіональну культуру і вартости оперты о локальну традицию і звыкы. Признавана є інституциям, артистично-культурным орґанізациям або ґрупам осіб за осягніня на поли реґіональной культуры. Окрем реґіональных ансамблів в конкурсі можут брати участ і інчы ґрупы, якы в своій діяльности берут з культуровой дідовизны поколінь, м.ін. локальны інституциі занимаючы ся охороном нематерияльной спадковины. Лавреаты отримают статуі і фінансову нагороду. Будут они выбраны Зарядом Малопольского Воєвідства на основі рекомендациі Капітулы Нагороды.