Номінації на Pro Arte Ruthenorum 2023 одкрыты

За інформаційов, котру подав голова журі Націоналной премії за русиньске уменя імени Івана Манайла Pro Arte Ruthenorum – Андрій Манайло, уж было одкрыте подаваня номінацій на премію за 2023-ій рік.

Основателями премії за русиньске уменя суть Світовый конґрес Русинів і Русиньске націоналне самосправованя міста Вац в Мадярьску. Премія была основаня почас 15-го Світового конґресу Русинів, котрый у 2019-ім році проходив у Любовняньскых купелях.

Дотеперь трьоми лавреаты

Премія была основана з цільом підпоры і нагороджіня сучасных русиньскых умелців, котры свойов умелецьков творчостьов зробили значный вклад до розвитку і пропаґації світового русиньского уменя.

В рамках премії лавреат здобывать ґравірованый кріштальовый трофей з подобов Івана Манайла, вызначного русиньского маляря, діплом і матеріалну фінанчну підпору умелецького діятельства на суму 200 000 форінтів, што є коло 530 евр. Премія уділює ся од 2020-го року.

О лавреатови вырішує журі Комісії про културу Світовой рады Русинів. Першым лавреатом у 2020-ім році став русиньскый малярь з Підкарпатя Володимір Микита. З причіны пандемії му была премія передана аж у 2021-ім році.

Лавреатом за 2021-ый рік быв Владо Няряди із Сербії, а премію перевзяв за лавреата на 16-ім Світовім конґресі Русинів у Криниці Дюра Папуґа. Затля посліднім лавреатом став у 2022-ім році in memoriam Штефан Телеп з Польщі. Премію почас 11-го Меджінародне бєнале лемківской/русиньской културы в Криниці перевзяла вдова по малярьови – Олена Телеп.

Мож подати номінації

Подаваня номінацій было одкрыте на сайті премії. Номінації можуть приходити з цілого світа. У пропозіції на номінанта має быти його мено і коротка біоґрафія, обоснованя на номінацію і ілустратівный матеріал його тврочости. Вшыткы крітерії потрібны ку номінації мож найти на спомянутім сайті.

Номінації мож передкладати тот рік до 31-го мая. Журі вырішыть о тогорічнім лавреатови 30-го юна. Святочне удільованя Націоналной премії за русиньске уменя імени Івана Манайла Pro Arte Ruthenorum одбуде ся почас засіданя Світового конґресу Русинів, якый тот рік одбуде ся в авґусті в столиці Войводины – Новім Саді.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА