Святкуєме з Анном Кузмяковом

Днес, 17. лютого уродины святкує журналістка, соспільна діячка Русинів на Словациі – Анна Кузмякова. Вродила ся в 1949 році в русиньскым селі Фольварк (днес Страняны) на Спишы (то сусіднє село до лемківскых Явірок).

Анна Кузмякова была предсідательком Русиньской Оброды на Словакциі в роках 2001-2006. За часів єй шефуваня РОС – найбільша русиньска орґанізация заініциювала проєкты, котры сут успішні реалізуваны доднес. Мам ту на думці зачатий в 2000 році конкурс деклямуваня русиньской поезиі, прозы і авторской творчости “Духновичів Пряшів” і фестіваль русиньского гумору “На фиґлярску ноту”. Ій тіж сме вдячны за реалізацию памятникового, основного для пробуджуваня русиньской достоменности, музычного проєкту, під наголовком “Гымнічны співы Русинів”. На выданій Анном Кузмяковом платни нашли ся гымны і пісні Русинів зо вшыткых земель. Не бракло тіж лемківскых пісен – “Горы нашы”, ци “У горах Карпатах”. Ювілятка єст авторком книжкы про свій рідний Фольварк. Замістила там співанкы, фотоґрафіі і оповіданя зо села. Зредаґувала книжку пн. “Наша двадцятьрічна путь”, в котрій описана єст діяльніст Русиньской Оброды од основаня до 2010 рока і вельо інчых.

Найбарже знана як редакторка “Народных Новинок” і “Інфо Русина”. Анна Кузмякова єст оддан0м і жертвенном русиньском діячком. Памятат і о нашым радию, служыт нам словом і співанками, котры про нас награла і передала, жебы сме в нас на Лемковині і по цілым світі знали про вшытко, што русиньскє.

Анна Кузмякова од років в русиньскій редакциі кошыцкого радия рыхтує і веде концерт з желанями. Днес єст тот ден, коли то Она повинна достати од нас найкрасшы желаня. Днес чуєме ся в обовязку подякувати Ій за вшытку роботу, котру в своім жытю зробила, а і про нас, на Лемковині, задумала зробити…

На спомянутій уж платни з гымнічныма співами Русинів находит ся і тот, котрий днес заспіват в чест Анні Кузмяковій наша редакция, а думаме, што з нами і вельо нашых слухачів.

Дорога Ювілятко, приймий желаня – Во здравіі, во спасеніі многая, благая… многая благая літа.