«Слово» – Праздник Воскресенія – Пасха – неділя, 9.00 год

Є ту час Пасхы – світлого Воскресіня. Свята Церьков торжество голосить: Хрістос воскрес! Перешла доба Великого посту, перешов Страстный тыждень, коли сьме вєдно з Хрістом переходили його терпіня, роспятя і похованя.

Але приходить недільне рано, коли звучіть голос жен приходившых од гроба: Хрістос є жывый, Ісус ся появив ученикам ідучім до Емаус, потім ся появлять ученикам, приходить через заперти двері а давать їм свій покій.

Тоту радостну подію воскресіня днесь голосить свята Церьков словами канону преподобного Йоана Дамаскина: Воскресенія день, просвітим ся людиє, Пасха Господня, Пасха: Од смерти бо ко жызни, і од землі к небесі, Хрістос Бог нас приведе.

Хрістос своїм воскресіньом зничів владу смерти, гріха і діавола. Старозавітна пасха была лем курточасным ослободжіньом од рабства Еґіпту до слободы обіцяной землі. То є од землі ку землі. Але Хрістос нас ослободив од царьства смерти, гріха і діавола.

А так нас днешній день кличе: Просвітим ся людиє. Быти у світлі у своїй душі, в слободі од гріха. А тоту радость маме звістовати тому світу, котрый зануреный до духовной смерти, до страху і до непокоя. А так най в сердці каждого із нас звучать тоты радостны слова: Хрістос воскрес!

В неділю, 16. апріля 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 16. апріля 2023 р. о 12.00 год. і 17. апріля 2023 р. о 2.00 год. за русиньскым часом.