Велика реконштрукція музея Енді Варгола зачала

Пряшівскый самосправный край (ПСК) в пятніцю 14-го апріля 2023-го року переданьом ставбы зготовительови офіціално спустив проєкт компексной реконштрукції Музея модерного уменя Енді Варгола в Меджілабірцях. Інформовала о тім Даша Єленьова, говоркыня ПСК.

До великой інвестічной акції за майже 12,3 міліона евр дає край фінанції з властного розрахунку, і дотацію од державы. Велика модернізація має принести оріґіналну ставбу, многы мултімедіалны і інтерактівны елементы а векшу атрактівност музея, але і реґіону.

Інвестіція народного характеру

Замір на велику реконштрукцію меджілабірьского музея выникнув іщі у 2019-ім році і здобыв підпору державы, котра на проєкт на початку выділила 7,1 міліона евр.

В часі, коли творила ся проєктова документація потрібна на реалізацію, ціны наросли і вытраты на реконштрукцію радікално пішли горі. Наконець вытраты наросли на 12,3 міліон евр, причім з Міністерства фінанцій Словацькой републікы піде лем 5,1 міліона а ПСК зафінанцює перебудованя сумов 7,2 міліона евр.

„Цілый проєкт мав властно складный вывой, но основным є, же сьме з крайскыма посланцями нашли згоду – тот музей собі залужыть значну інвестіцію, нелем частковы оправы і звычайны реконштрукції,“ повів Мілан Маєрьскый, председа ПСК, котрый є зряджовательом музея Енді Варгола.

„Зачінаме з реалізаційов унікатной ставбы, котра має надреґіоналный, майже народный характер. Бісідуєме о єднім з двох світовых музеїв, котрый має величезный потенціал про презентацію міста, края і Словакії. Інвестіція є вызначна і з погляду розвитку реґіону, підпоры турістічного руху ці бізнісового оточіня,“ продовжовав Маєрьскый.

Нова фасада і голоґрафія

Нова тварь музея бы мала корешпондовати з унікатным значіньом і одказом краля поп-арту. Реконштруовати ся буде фасада, просторы, выбудує ся приставба і надставба.

Перебудова має принести інтеркатівность, аплікацію світловых, проєкчных, звуковых і голоґрафічных технолоґічных елементів, включно презентації уменя в екстерьєрі на терасі, яка буде на стрісі, фасаді будовы, як і на новій площі, котра выникне перед будовов. Ціла реконштрукція бы мала тырвати 18 місяців.

Музей модерного уменя Енді Варгола дотеперь мав просторы в будові, котра была збудована як културный дім і довгодобо не повнила функцію модерного музея в контексті творів Енді Варгола. Будова з 1980-ых років была перестаріла і технічный стан вже не быв добрый про заміры зряджователя і музейників.

„Модерзнізація обєкту принесе фундаменталне розшыріня ґалерії і депозіту, выикнутя новых ательєрів, екслузівный простор про освітні проґрамы, аж по інтереснішы експозіції. Скелет будовы буде дотвореный респонзівнов фасадов, з котров є повязана ціла есенція візуалу і унікатного скапчаня екстерьєру з інтерьєром. Выразно змодернізованы експозічны просторы, бістро, оддыхова зона з посиджіньом, стріха з амфітеатром про 100 людей, і много інтерактівных а мултімедіалных елементів, вірю, принесуть навщівникам музея дакількократно богатшый зажыток, як дотеперь,“ доповнив директор музея Мартін Цубяк.

Музей ся переніс до другой будовы

Музей модерного уменя Енді Варгола є дочасно перенесеный до деташованого працовиска будовы бывшой ґімназії в Меджілабірцях, причім творы суть забезпечены в депозітах. Хоць музей буде почас реконштрукції запертый, актівности будуть робити ся дале.

Музей приготовлює веце загранічных выстав у Словенії, Хорватії, і ку кінцю рока в просторах Европской централной банкы у Франкфурті. В рамках Словакії суть напланованы выставы концепту Warhol Tour, і то в містах Стропків, Снина і Гуменне. Реалізовати ся будуть експеріменталны выставны, едукачны і інтересны онлайн проєкты.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА