Сумар дня 13. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 13. квітня/апріля 2023 р.

Вмер Іван Туряниця

Як поінформувал Ужгородскій Нацийональный Університет, 9. квітня/апріля вмер Іван Туряниця, наш вченый, доктор біолоґічных наук, професор Катедры Біохіміі і Фармаколоґіі Ужгородского Нацийонального Університету. Покійный вродил ся в 1943 р. Од 1989 до 2000 р. занимал посаду ведучого Катедры Біохіміі і Фармаколоґіі Медичного Факультету УНУ. За результатами науковой роботы Іван Туряниця має приписаных понад 400 науковых публикаций і 25 патентів. Туряниця был записаный до Книгы Найпопулярнійшых Люди Украіны, а його популярніст росла і за границями, і так його мено записане было і до книгы найзнамійшых люди плянеты. В 2004 р. Світовый Науковый Комітет в Кембрідж нагородил го Дипломом Славы за выдатны досягніня в біохіміі. По 1989 р. Іван Туряниця одкрыто выступувал за автономію Підкарпатской Руси (Закарпатской Области) в рамках Украіны, што было результатом референдуму з 1991 р., і за офіцийне вызнаня Русинів як окремого народа. В 90. роках был депутатом Закарпатской Областной Рады. Шефом Общества Карпатьскых Русинів был од 1992 р. до 2004 р. Вчас того періоду, од 1993 до 2001, был і членом Світовой Рады Русинів за Украіну. Туряниця закликувал до кодифікациі русиньского языка, сам был автором збіркы русиньской поезиі пн. «Рудна земле пудкарпатська».

Монашескій постриг в Высовій

В понедільок, 10. квітня/апріля, на обшыри перемышльско-ґорлицкой єпархіі ПАПЦ монашескій постриг малой схимы принял з рук архієпископа Паісия, о. прот. Марек Ґоцко. Новый монах принял імя Методий на памятку св. Методия – апостола Славян. Постриг одбыл ся в церкви св. Михала в Высовій, де діє і мужскій православный монастыр. Монах за своі дотеперішні заслугы был з благословліня митрополиты варшавского і цілой Польщы Савы піднесеный одраз до гідности ігумена з правом ношыня креста з прикрасами. Монах Методий был м.ін. особисто заанґажуваный в одбудуваня (по пожарі) церкви в Команчы. Понедільковый монашескій постриг мож рахувати за історичну подію на Лемковині.

Ювілейный концерт Верховины

Такой о місяц, 13. мая в варшавскым Клюбі Проґресия одбуде ся ювілейный концерт фолькового ансамблю Верховина, якій грат і співат неперестанно од 1991 р. Буде то специяльный концерт, якій має підсумувати тридцетлітню історию діяльности і творчости колективу. Вчас выступу запрезентуваны будут пісні з ріжных періодів діяльности Верховины, так вельоголосовы співы, як і інструментальны творы. На сцені окрем актуального складу вкажут ся і члены ансамблю, котры грали в ним протягом 30 років. Припомнийме, што Верховина то капеля, яка в своім репертуарі має і лемківскы пісні, была частым гостьом нашых лемківскых подій і ватр.

Христос Воскрес!

A на конец з нагоды ближучого ся праздника праздників – вшыткым любителям нашых медий, зосередженых при Медияльній Ґрупі ЛЕМ.фм+ – хочеме желати пережыти тот великодній час з радістю, теплом і надійом на іщы ліпше будуче. Желаме Вам Веселых Свят, а з нима смачной паскы і кобаскы, острого хріну, яєц, а предовшыткым глубокой віры в дане Воскресшым Христом вічне жытя. Христос Воскрес! Того желат редакция ЛЕМ.фм і члены Стоваришыня «Руска Бурса» в Ґорлицях.