Закарпатьска область і Пряшівскый край хотять інтензівнішу співпрацу

Послідній марцовый тыждень 2023-го року проходило білатерлане їднаня меджі Пряшівскым самосправным крайом (ПСК) і Закарпатьсков областьов Україны.

Підпредседове ПСК Штефан Бієляк і Йозеф Канущак стрітили ся з головов Закарпатьской областной рады Володиміром Чубірком, котрый подяковав жытелям Пряшівского краю за гуманітарну поміч.

Як інформовала Даша Єленьова, говоркыня пряшівской жупы, Пряшівскый самосправный край і Закарпатьска областна рада в Ужгороді хотять зінтензівнити співпрацу в словацько-україньскім пригранічу, і рихтовати конкретны проєкты заміряны на повойнову обнову і розвиток теріторій. Стріча одбыла ся в просторах Уряду ПСК.

Співпрацу позначів конфлікт

Довгорічне партнерство меджі Пряшівскым самосправным крайом і Закарпатьсков областьов Україны од минувшого року позначів войновый конфлікт. Вдяка войні взаємны контакты даякый час были концентрованы лем на гуманітарну поміч.

Но марцова навщіва представителів Закарпатьской области вказує веце на стратеґічну роль співпраці з выходом Словакії, што може быти вызначне „в процесі европской інтеґрації Україны, приході інвестіцій, але і всесторонного розвитку приграніча,“ інвформовала Єленьова.

„Україна прямує до Европской унії, і каждый член вступовав до того союзу з плусами, но і минусами. Зато мы бы хотіли перевзяти скушености з Пряшівского краю, жебы сьме виділи, якы зміны сьте на тій пути реалізовали,“ повів голова Закарпатьской областной рады Володимір Чубірко.

„Єдночасно желаме собі, жебы нашы реґіоны іщі веце товаришыли у вшыткых областях як є освіта, здравотництво ці соціалны службы. Треба нам оправити драгы, інфраштруктуру, і зліпшыти жывот в пригранічных реґіонах, котры мають сполочны проблемы,“ продовжовав Чубірко.

За його словами на рішіня тых проблем служать різны проґрамы черезгранічной співпраці, в котрых суть грошы, якы хоче Закарпатьска область дати людям в різных областях. „Сполігаме в тых намагах на підпору Пряшівского краю, котру видиме інтезівно уж довгы рокы,“ доповнив голова Закарпатьской областной рады.

Хотять свторити юрідічный субєкт

На стрічі ся бісідовало о можливостях кооперації і капчаня інштітуцій з приграніча, як і о черьпаню европскых фінанцій з проґраму Interreg NEXT. Так само діскутовало ся о приправі сполочных проєктів, передовшыткым на обнову лоґістікы і інфраштруктуры, гранічного перепоїня на Закарпатьску область, включно будованя біціґльовых стежок ці розвитку турістічного руху.

„Пряшівскый край є найблизшым партнером Україны, в тім припаді Закарпатьской области, і сусіды мають собі помагати. Сьме гранічным реґіоном в рамках Европской унії. Покля Унія буде хотіла прямовати велику інтезівну поміч до Закарпатьской области, буде хосновати і пригранічны реґіоны, котры знають омного інтензівніше і адресніше помочі, хосновати уж провірены скушености і полегшати ток інвестіцій про Україну. В тім процесі можеме быти на помочі і быти барз хосенны, а єднако можеме помочі розвитку нашых теріторій,“ повів підпредседа ПСК Штефан Бієляк.

Додав, же тота співпраца буде повнити ся в шыршім контексті. „На столі є меджівладна ініціатіва Словакії і Україны, конкретно створіня нового юрідічного субєкту – Европского зґрупованя теріторіалной співпраці, котре бы было інштрументом про легше черьпаня еврофондів без непотрібной адміністратівы і бюрокрації.“

Можливу співпрацу представителі сусідніх реґіонів видять і в далшых ключовых областях, якыма суть охрана здоровля і жывотного оточіня, соціалны службы, регабілітація, освіта і розвиток бізнісовых контактів.

На словацькім боці і далше є актуална поміч біженцям, як і гуманітарна поміч. „Хочу подяковати ся за кажду форму помочі із Словакії і Пряшівского краю, котра іде на Україну, або будьякым способом помагать полегшати сітуацію нашых жытелів. Нашым односинам хочеме дати новый імплуз, залучіти до той співпраці далшых людей із сел, реґіону, бізнісменів і зробити вшытко, жебы наша співпраца была прикладом, жебы была сінхронна і про обидва черезгранічны реґіону хосенна,“ повів Володимір Чубірко.

Резултатом білатералного їднаня ПСК і Закарпатьской областной рады буде і офіціална декларація партнерства в рамках Договору о співпраці, котрый бы обидві стороны мали підписати в найблизшых місяцях.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА