«Слово» – 5-та неділя Великого посту – неділя, 9.00 год.

Ісус ідучі до Єрусалима бісідує зо своїма учениками о своїм терпіню, котре його там чекать. А тогды двоми із його учеників Яков і Йоан просять од нього славу, жебы могли быти в його славі по Його правій і лівій стороні. Як бы они не чули, што Ісус говорив. Він говорить о смерти, а они глядають про себе славу.

Ісус доволює тот вопрос од них, жебы через них указати на єдну небезпечну хвороту в духовнім жывоті. Желаня порожньой славы того світа. Тота страсть порожньой славы руйнує вшыткы заслугы, вшытко здобыте і в часі посту: піст, молитвы, милостыні. Бо перед себе чоловік ставить не Бога, але чоловіка. Робить перед очами людей. Хоче мати выгоды од людей.

А так на тото їм Ісус одповідать, не знате, што просите. Справды не знали. Бо были засліплены порожньов славов, котра їм не давала видіти.

А як іншы апостолы? Они мерзили ся на тых двох, но не зато, жебы были досконалішы, але зато, бо їм завиділи. А так Ісус одкрывать, што вшытко, якы іщі хвороты, по так довгій добі пребываня з Ним, находили ся в сердцях апостолів. Они іщі не прияли Святого Духа.

Ісус хоче, жебы тото вшытко вышло вон, жебы міг подати лік. А якый є на тото лік? Говорить їм. Знате, же тоты, што тримають себе за владыків, панують над народами, їх вельможы мають над нима міць. Но меджі вами най так не буде. Хто хоче быти першый меджі вами, най буде слугом вшыткым а головный най буде вшыткым рабом.

Тым указує, же не сперать прягнути по першенстві. Але хто хоче тото першенство в Божім Царьстві, тот мать быти першый в жжертвенім служіню любви. А сам давать приклад, словами. Бо і Сын чоловіка не пришов, жебы Йому служыли, але жебы служыв і дав свій жывот на одкупліня за многых.

Так Ісус одкрывать тоту рану у своїх любых учеників, жебы міг дати і лічіня. Але робить то і про нас, жебы мы указали раны свойой душы – свої гріхы, а так прияли Його лічіня – одпущіня нашых гріхів. Слава Ісусу Хрісту!

В неділю, 2. апріля 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 2. апріля 2023 р. о 12.00 год. і 3. апріля 2023 р. о 2.00 год. за русиньскым часом.