Сумар дня 31. марця 2023 р.

Приносиме вам сумар медияльной ґрупы ЛЕМ.фм+ на ден 31. марця 2023 р.

«Меншыны і іх языкы в кризі»

На інтернетовым сайті Выдавництва Варшавского Університету явила ся заповід новой публикациі пн. «Меншыны і іх языкы в кризі» – Антистиґматизацийный пакєт проєкту «Языковый антидот: языкова жывотніст як нарядя будуваня психічного добростану, здравля і постійного розвитку», в науковій редакциі проф. Михала Білевича і проф. Юстины Олько. Публикация рахуюча 174 стороны анализує влияня дискримінациі досвідчаной етнічныма меншынами і міґрантами на іх здоровля і добростан, хосен з захованя материньского языка і сильной етнічной достоменности та наслідства пандеміі для тых ґруп. В працы сут і практичны рекомендациі і розвязаня, што мают на ціли поправу обставин фунґуваня меншыновых ґруп в Польщы, підтримку старань о захованя іх языків і культуры, протидіяня дискримінациі і стиґматизациі та будуваня ліпшых реляций медже етнічныма меншынами а векшыновыма ґрупами. Пакєт єст направленый на шыроку ґрупу чытачів: даючых роботу, урядовы і едукацийны інституциі, самоурядовців, локальны орґанізациі, журналистів, учытелів, студентів і активістів. Актуально рыхтувана єст і лемківска версия публикациі.

80. пленарне засіданя СКУтНіЕМ

Як подало Міністерство Внутрішніх Справ і Адміністрациі, 19. квітня/апріля одбуде ся 80. пленарне засіданя Спільной Комістиі Уряду та Нацийональных і Етнічных Меншын. В пропонуваным порядку засіданя нашли ся пункты про фунґуваня освіты нацийональных і етнічных меншын і підручників до мешыновых языків, ци електронный систем дотаций, але і інформация Міністра Едукациі і Наукы про стан і переписы тыкаючы вчыня німецкого языка як меншыновочо та перспективы змін в тій обшыри. Окрем того на засіданю буде тіж дискутувана тема лемківскых забытків материяльной культуры на Лемковині. На тему выступлят представник Міністерства Культуры та Нацийональной Спадковины, Ґенеральный Консерватор Забытків і представник лемківской меншыны в Комісиі.

Міністерство Фінансів піднесло квоту дотаций на креницкы інвестициі

Зас звекшыла ся вартіст інвестиций реализуваных в Креници в звязку з орґанізацийом ІІІ Европейскых Ігр Краків-Малопольща 2023. Як подал бургомайстер Пьотр Рыба, Міністерство Фінансів рішыло піднести квоту дотациі на модернізацию Ледовой Галі в Креници аж о 2 млн злотых. Додатковых 166 тис. злотых было признане і на будову тору до ізды біциґлями МТБ.

Великодні варштаты в Рускій Бурсі

Уж в тоту неділю 2. квітня/апріля просиме до Руской Бурсы в Ґорлицях, де спільно будеме баткати великоднi писанкы. Вшыткы охочы прикрасити яйця на Великден будут мати таку нагоду – стріча пройде так перед Великодньом празднуваным подля григорияньского, як і юлияньского календарів. Вчас спільной стрічы продолжана буде традиция рыхтуваня великодніх писанок батіковом методом – розтопленый воск наносит ся на верхню верству яйця, хоснуючы метальовый писалец з головком. Участ є безплатна, забезпечены будут фарбы, воск, шпилькы. Зо собом треба принести яйця – найліпше, жебы уж были поварены.

Варштаты батканя яєц в Михалові

В тот сам ден, в неділю 2. квітня/апріля, варштаты прикрашаня яєц, воском і не лем, одбудут ся в Михалові на Нижнім Шлеску. На варштаты просят реґіональный Центр Культуры в Хоцянові і Анна Горощак. Варштаты одбудут ся іщы 11. квітня в Оґродзіску і 12. квітня в Жабицях.