Сумар дня 30. марця 2023 р.

Приносиме вам сумар медияльной ґрупы ЛЕМ.фм+ на ден 30. марця 2023 р.

Конференция, де буде присутный лемківскій язык

В днях од 31. марця до 1. квітня/апріля на Курпях в місцевости Кадзідло пройде Загальнопольска Конференция Трансляторско-Діалектолоґічна. Орґанізатором подіі єст Ґміна Кадзідло, Мазовєцкє Наукове Товариство, Публична Бібліотека Войцєха Возняка, Центр Курпівской Культуры і Звязок Курпів. Конференциі патронує Маршалок Адам Струзік. Цільом конференциі єст вказаня богатства світа, Европы і Мазовша через презентацию працы трансляторів і діалектолоґів. В рамках товаришучых подій одбуде ся презентация «Малого Прінца» в ріжных языках і діалектах, м.ін. буде вказаный «Малый Прінц» по лемківскы, тлумачыня котрого зробил Петро Криницкій. О лемківскым языку буде мала выступліня др габ. Олена Дуць-Файфер з Ягайлоньского Університету. Окрем того будут доповіди дослідників і представників інчых языків і діалектів.

Кардинал Кох на Словациі

В днях од 28. до 30. марця на Словациі з візитом перебыват префект Дикастериі на підпору єдности християн, католицкій кардинал Курт Кох. Єпископ уж одвиділ Кошыці, Михалівці, Пряшів, а остатній ден буде в столици державы – Братиславі. Проґрам кардинала Коха зачал ся віторок, коли то одбыл стрічу з представниками михалівско-кошыцкой православной єпархіі. Префект зашол до катедрального собору свв. Кірила і Методия в Михалівцях. В тот ден завитал і до грекокатолицкого поломницкого центра в Клокочові. Пак одышол до Кошыц. Вечером в грекокатолицкым катедральным соборі Рождества Пресвятой Богородиці брал участ в екуменічным концерті, котрый орґанізувал ся з нагоды його візиты. В середу Кох пришол до Пряшова, де го принял грекокатолицкій владыка Петро Руснак, апостольскій адміністратор пряшівской архієпархіі. Там з владыками Кірилом Васильом і Міляном Лахом посмотріл на выставу о істориі грекокатолицкой церкви, а пак был і в соборі св. Йоана, де поклонил ся мощам русиньскых святых, єпископів Павла Петра Ґойдича і Василя Гопка. Присутный был тіж на Пряшівскым Університеті. Стрітил ся і з православным митрополитом Чешскых Земель і Словациі – Ростиславом. Днес кардинал єст в Братиславі.

На Словациі одбыли ся дополнюючы выборы

В суботу 25. марця на Словациі проходили дополнюючы комунальны выборы, котры одбыли ся і в дакотрых русиньсых селах на Пряшівщыні. Новых старостів сел мают Якушівці, рідне село Енді Варголя – Микова, Доброслав, Габура ци Нехваль Полянка. Выборы конец-кінцьом не проходили в селі Березовец, сниньского окресу, а так само в Старині, в окресі Стара Любовня, де на посаду старосты зас нихто не кандидувал. Брак кандидатів на функцию старосты в дакотрых меньшых селах то не нова річ. Перед парома роками інформували сме о тым, што проблем з выбраньом старосты мала хоц бы невелика Ондавка, што лежыт близко границ Лемковины (граничыт з Конечном).

Стріча з автором книжкы о східній Лемковині

Днес о 17.00 год. Реґіональный Музей в Березові і Выдавництво Лібра орґанізуют стрічу з др. Губертом Оссадником, котрый єст автором свіжой книжкы о Лемковині під назвом «Медже Ославом а Ясьолком. Східня Лемковина в роках 1918-1939». Вчас стрічы буде мож придбати книжку в промоцийній ціні. Окрем того в проґрамі заплянувано выступ ансамблю «Лем МЫ» з Команчы, котрый презентує м.ін. лемківскы пісні. Детальну рецензию новой публикациі од Выдавництва Лібра найдете на нашым портали.