Сумар дня 28. марця 2023 р.

Приносиме вам сумар медияльной ґрупы ЛЕМ.фм+ на ден 28. марця 2023 р.

Бурсакы стрітили ся на загальным зобраню

25. марця в Ґорлицях члены Стоваришыня «Руска Бурса» стрітили ся на загальным зобраню, котре за ціль має підсумувати діяльніст общества за попередній рік, накрислити текучы і будучы проблемы та выбрати новы власти орґанізациі. Бурсакам были представлены справописы (мериторичный, фінансовый і од Ревізийной Комісиі), а пак члены стоваришыня дали абсолюторию одходячому зарядови. Заряд общества, на котрого челі рішыньом присутных дальшый уж раз станула Наталия Малецка-Новак, до наступного загального зобраня остає подібный. Разом з ведучом дополняют го Олена Дуць, Павел Малецкій, Адам Шевчык, Андрий Трохановскій і Даміян Трохановскій. Бурсакы бесідували не лем о формально-технічных справах, а і реализуваных тепер і плянуваных активностях.

Єст уж траса тогорічного конкурсу «Карпатскы Змаганя Курєрів»

В Вашраші в Інституті Вацлава Фельчака прошла конференция посвячена «Карпатскым Змаганям Курєрів», в часі котрой запрезентували тогорічну трасу конкурсу. Ювілейны, бо уж сороковы, біциґльовы змаганя пройдут на обшыри Мадяр, Словациі і Польщы в містах важных історичні та особливо заслуженых на курєрскій пути ІІ світовой войны. Орґанізаторы рішыли поділити трасу на пят етапів, каждый з інчым місцьом старту і о ріжной долгости. Першый старт та початок змагань пройде 28. квітня/апріля в Будапешті, два наступны на Словациі в Бановцях і Старій Любовни, а остатні два в Польщы в Нєдзіци і курорті Івонич, де 3. мая подія буде мала офіцийне закінчыня. «Карпатскы змаганя курєрів» то єден з найбільшых того рода конкурсів ціненый не лем за історичне значыня, але тіж ґеоґрафічну страну – серед стартуючых ґруп находят ся представникы держав цілого світа.

«Початкы Лемковины – факты і міты»

Карпатскє Товариство просит до участи в третій в тым році «Віртуальній Карпатскій Стрічы». Подія пн. «Початкы Лемковины – факты і міты» пройде 30. марця, а вюл ю буде проф. др габ. Михал Парчевскій, археолоґ специялизуючый ся в початках славяньской культуры в Польщы та вчасносередвічным осадництві в Карпатах. Выклад зосердит ся на анализі найновшых археолоґічных і історичных даных та дискусиі з даякыма теориями о заселяню Карпат. Стріча зачне ся о 19.00 год. і як все трансмісию мож буде обзерати на каналі YouTube Карпатского Товариства.  Кєд дахто хоче взяти активну участ в дискусиі, єст тіж можливіст участництва через плятформу ZOOM, при чым скорше треба ся зголосити до орґанізаторів.

В Ґорлицях глядают думок як притягнути туристів

На марцьовій сесиі Рады Міста Ґорлиці вказала ся думка дармовых білетів на переізд з желізницьовой стациі в Заґужанах до центра міста Ґорлиці. Така ідея вышла од єдного з радных Адама Пєховича і доцільово тыкала бы подорожуючых потягами, котры в своій подорожы могли бы ся затримати в Ґорлицях на звиджаня ци одпочынок. Такє розвязаня не сподабало ся каждому. Як зазначыл заступця бургомайстра, такє розвязаня было уж ведене через піл рока і не тішыло ся за великом популярністю, а стация в Заґужанах єст брана до увагы в ріжных леніях автобусів МЗК.

Ґміна Команча просит до выполниня анкєты, котра поможе в будучым розвитку ґміны

Власти ґміны Команча просят жытелів ґміны і не лем, тіж каждого, хто заанґажуваный в розвиток ґміны, жебы выполнити анкєту, котра допоможе властям зрыхтувати як найліпшу Стратеґіі Розвитку Ґміны на рокы 2023-2030. Документ дозволит окрислити напрям, в котрым власти повинны іти, а тіж обшыри розвитку, на котрым найбарже залежыт мешканям ґміны. Анкєта находит ся на офіцийным сайті Уряду Ґміны Команча.