Сумар дня 24. марця 2023 р.

Приносиме вам сумар медияльной ґрупы ЛЕМ.фм+ на ден 24. марця 2023 р.

Уж о хвилю конец лыжного сезону

В горах ближыт ся конец лыжного сезону. Неодолга зачнут ся весняны технічны перегляды, ведены м.ін. Польском Кабельном Желізницьом (PKL). Будут они тіж обнимати гірскы вытягы і желізниці. В Креници колейком ретро на Паркову Гору, як і ґондольом на Креницку Яворину мож буде ся достати ішы лем до 10. квітня/апріля. По тым як завершaт ся перегляды, трасы будут урухомлены аж на конец місяця. В часі технічных бадань з опоряджыня будут корыстати м.ін. ратівникы GOPR, цілю школіня з евакуациі туристів з гірскых колейок і вытягів.

Дальша спортова інвестиция в Креници

Бургомайстер Крениці Пьотр Рыба поінформувал о дальшій інвестициі, што звязана єст з оранізацийом ІІІ Европейскых Ігр Краків-Малопольща 2023, яка перманентно буде служыла в Креници. В минулым тыжни было підписане догваріня на доставу і монтаж мультіспортовой верхньой верствы, котра покрыє ледову тафлю ледовиска в часі Ігр. По тій подіі підлога буде розкладана в періоді браку выледжыня тафлі, т.є. найчастійше од квітня до червця каждого рока. Ледова галя буде мала збогачену оферту, а на накладаным поверху появлят ся ґрафікы боіск до гры в волейболь, футсаль, унігокей і ін-ляйн гокей. Догваріня обнимат тіж доставу брамок і штанґ до тых дисциплин. Як подал бургомайстер Крениці, згідно з гармоноґрамом реализуваны сут і другы інвестициі, як будова амфітеатру, ремонт ледовой галі, будова тору дюаль і памптраків для роверів МТБ на Парковій Горі. В минулым тыжни был выбраный выконавця будовы тору MTB XCO, на яку ґміна Крениця достала з воєвідскых середків дотацию в высокости близко мілийона злотых.

Фоторафічный конкурс ”Карпатскій Рік”

Рушыла чергова едиция фотоґрафічного конкурсу ”Карпатскій Рік”, орґанізуваного Стоваришыньом Res Carpathica. Участ в конкурсі може взяти каждый. Зголосити мож максимально три знимкы выконаны в 2022 році, мериторично навязуючы до шыроко пониманой карпатской тематикы. Конкурсова комісия выбере спосеред зголошынь пят знимок, котры будут пак даны під голосуваня на фейсбуковым сайті Стоваришыня. Автор выграной фотоґрафіі отримат нагороду, а вшыткы выріжнены працы будут опубликуваны в календарі Стоваришыня на будучый рік. Знимкы мож высылати на майльовый адрес орґанізатора до 30. квітня/апріля.

Лемківско-Погіряньскій Великодній Ярмак

Припоминаме, што в тоту неділю 26. марця в Мазярскій Загороді в Лоси пройде Лемківско-Погіряньскій Великодній Ярмак, орґанізуваный Музейом Дворы Карвациянів і Ґладышів. Головном атракцийом ярмаку буде презентация выробів ремісників і народных творців та можливіст купити розмаіты товары. В проґрамі подіі находят ся м.ін. великодні варштаты і презентациі, в тым лемківскых яєц ци погіряньской пальмы. Не бракне тіж традицийных забав звязаных з Великодньом. Подія закінчыт ся концертом хору Cantore Carvatiani в церкви в Лоси. Полный проґрам подіі находит ся на сайті музею. Вступ на ярмак то символична злотівка.