Сумар дня 21. марця 2023 р.

Приносиме вам сумар медияльной ґрупы ЛЕМ.фм+ на ден 21. марця 2023 р.

 «Карпатска Стратеґія»

Тырвают працы над кінцьовом формом «Карпатской Стратеґіі». Проєкт медженародной ґрупы «Карпаты» тыкат заплянуваня макрореґіональной стратеґіі медхе карпатскыма державами заанґажуваныма в проєкт, при підпорі Европейской Уніі. Головном темом порушеном на остатній стрічы ґрупы, котра прошла в Бруксели в минулым тыжни, была можлива роля «Карпатской Стратеґіі» при будучій одбудові Украіны. Закля што Украіна отримала статус кандидатуючой до ґрупы державы, але як надіє Амбасадор Украіны при Европейскій Уніі, «Карпатска Стратеґія» може одограти значучу ролю в одбудові та розвитку Украіны. В бесідах участ взяли тіж представникы Польщы, м.ін. маршалок Малопольского Воєвідства, Вітольд Козловскій, якій підкрислил, што малопольскій реґіон єст заінтересуваный проєктами ґрупы і згаджат ся з творячом ся стратеґіом. Припомнул тіж, што в рамках охороны культуровой спадковины конечне єст задбаня о одповідню архівізацию, што буде реализуване в рамках основаного Інституту Нематерияльной Спадковины Карпатскых Народів. Буде то місце, де культура каждого з народів буде не лем презентувана, ци детально архівізувана, але інститут буде тіж місцьом едукациі.

«Малопольща памятат – захованя місц історичной памяти»

Іщы лем до кінця марця мож складати внескы в конкурсі «Малопольща памятат – захованя місц історичной памяти». Конкурс направленый єст на територияльны єдниці з малопольского воєвідства. В рамках проєкту мож провести консерваторскы ци будовляны роботы при історичных обєктах. Цілю конкурсу єст підтримувати реґіональну культурову спадковину, котра єст репрезентувана в материяльный спосіб і єст приміром історичной памяти. До конкурсу мож зголошувати історичны будинкы ци обєкты малой архітектуры, такы як памятникы ци цмонтері. Зголошуваны проєкты не мусят тыкати обєктів вписаных до реґістру забытків.

В Польковицях, Радваницях і Ґрембоціцах мож вымінити непотрібны річы на саджінку братка

Еколоґічна акция в духу zero waste для жытелів місцевости находячых ся в звязку ґмін Мідьового Басену. Яр то час порядків, а же днес єст календарьовый першый ден яри, звязок ґмін зрыхтувал акцию пн. «Ярні порядкы». В єй рамках каждый, хто лишыт непотрібны для него річы в місци предметів до вельоразового выкорыстаня в пунктах селективной збіркы комунального смітя, достане в рамках нагороды саджінку братка. Місця, де мож оддати річы, находят ся в Польковицях, Радваницях і Ґрембоціцах. Акция тырват до кінця квітня/апріля.

Першый Русиньскій Фестіваль книжок в Пряшові

Музей Русиньской Культуры в Пряшові просит на першый Русиньскій Фестіваль книжок з авторами. Стріча пройде в четвер 23. марця, а участ в ній возмут знаны русиньскы авторы: Людмила Шандальова, Мария Шмайдова, Миколай Коневал і Мирослав Жолобанич. В часі подіі мож буде выслухати та купити творы запрошеных авторів.

Власти Ґорлиц ждут на опініі жытелів міста в справі розбудовы державной дорогы нр 28

Припоминаме, што в найблизшый четвер 23. марця в Ґорлицях пройде інформацийна стріча в справі розбудовы державной дорогы нр 28. Тема будовы ронд, якы бы мали заступити колізийне скрижуваня на державній дорозі ідучій через Ґорлиці, є піднимана уж од долгого часу. На інформацийній стрічы будут представлены і омовлены актуальны проєктовы розвязаня. Інформацийны материялы мож уж тепер найти на інтернетовым сайті проєкту. Додатково до 24. квітня/апріля мож выповісти ся на тему нового проєкту через анкєту. Документ доступный єст на сайті Уряду Міста Ґорлиці.

фот. https://www.malopolska.pl/