Сумар дня 9. марця 2023 р.

Приносиме вам сумар медияльной ґрупы ЛЕМ.фм+ на ден 9. марця 2023 р.

Істория села Токаік в віртуальній реальности

Траґічну історичну подію з часів ІІ світовой войны мож видіти в віруатльній реальности. То представліня подій, якы одбыли ся в русиньскым селі Токаік (стропківскій окрес) в листопаді/новембрі 1944 р. Недавно в Музею Токаіцкой Траґедиі в Токаіку была одкрыта нова выстава під назвом «Выпалене село Токаік в віртуальній реальности». Автором єст Юрай Касарда. Выстава має дві части. Перша втягне заінтересуваных до істориі вбитых хлопів з Токаіка і представит двох, котры пережыли. Презентує она знищене село в мірі 1:1 в часі, кєд го німецкы нацисты спалили. Істория того села є складна і повязана м.ін. з фактом, што місцеве населіня помагало партизантам. В днях 19.-20. листопада/новембра 1944 р. німецкы воякы наперед позберали хлопів зо села коло церкви, а пак іх постріляли. Вчас масакры в Токаіку вмерло 32 хлопів, двом раненым ся чудом подарило пережыти. Пак ціле село нацисты спалили. Вступ на выставу дармовый. Єст она доступна в парох языках – по словацкы, польскы, анґлицкы і русиньскы.

Міст з Шымбарку до Білянкы запертый

Од 10. марця деревяный міст, што веде з Шымбарку до Білянкы, буде закрытый для руху. Причыном єст планный технічный стан обєкту і пильна потреба ремонту. То дост рухлива дорога, бо мож ньом доіхати м.ін. до Ропы, Лоси, Климківкы ци Устя Руского. Ремонт деревяной конструкциі мосту повтаряюют што пару років. Літом минулого рока з деревяных дощок зачали вказувати ся цвякы. По інтервенциях на хвилю тот проблем был розвязаный. Тепер обєкт мусит перейти векшу модернізацию, зато закрытя єст конечне. Зрыхтуваны сут два обізды – повітовыма дорогами через місцевости Ропа і Лося.

Буде дах над ґорлицкым ледовиском

В найблизшых тыжнях має зачати ся будова задашыня над ґорлицкым ледовиском, котре літом полнит функцию тенісовых кортів. Завдякы дахови ледовиско зимом буде могло долше функцийонувати, а осінньом пором, ци як хвиля буде планна, гра в теніса буде приємністю. Над обєктом має быти положеный дах з поліестрового материялу PCV, котрый буде розтягненый на деревяній конструкциі. Дах буде мал частично рухомы зовнішні стіны, так жебы літом мочы іх одкрыти. Буде побудуване і технічне поміщыня – істнуючый будинок буде перебудуваный. В пляні сут тіж тоалеты. Фінансы на будову даху в сумі 4 млн злотых походят з тзв. гірского щыта.

Продолжат ся ремонт ліґницкой стациі

Хто в остатнім році переізджал через стацию в Ліґници, напевно взріл, што дворец єст в постійным ремонті. Тырват він уж з опізніньом. Нерозвязаный до той поры єст проблем получыня міста на пілнічну і полудньову части, бо ремонт не обнимат тунелю, што іде під торами. Неполный ремонт має коштувати близко 38 млн зл. Інформацию на тему коштів інвестициі подало Міністерство Інфраструктуры. Мают быти вырементуваны дотля два пероны – 3 і 4. Пероны 2 і 5 мают быти підданы модернізациі в пізнійшым етапі. На тот момент ніт плянів перебудовы перону но. 1. Актуальна інвестиция має ся закінчыти в чертвертым кварталі того рока.