Сумар дня 1. марця 2023 р.

Приносиме вам сумар медияльной ґрупы ЛЕМ.фм+ на ден 1. марця 2023 р.

Ромска меншына і єй жытя в державі

Од 21. до 23. лютого/фебруара тр. одбывало ся засіданя Комітету Експертів Рады Европы дс. Ромів в Польщы. Головном квестийом тогорічной стрічы была потреба розпознаня непокоючых явиск, што нарушают соспільне фунґуваня ромской меншыны. Попередня візита прошла в 2015 р. і была посвячена темі активізациі Ромів на рынку роботы. Основны інформациі про ромску етнічну меншыну в Польщы представил Анджей Сосновскій з Департаменту Віроісповідань та Нацийональных і Етнічных Меншын. В дискусиі участ взяли м.ін. представникы ромской меншыны: Елені Тсетсекоу, Томас Таттау, Ельжбєта Мірґа-Вуйтович, і урядникы – м.ін. представникы Міністерств Здоровля, Едукациі, воєвідскых полномічных дс. нацийональных і етнічных меншын, а тіж представник Інституту Психіатриі і Невролоґіі. Поєдны панелі модерували працівникы Департаменту Віроісповідань та Нацийональных і Етнічных Меншын.

Грошы на уці для бачів

Заряд Малопольского Воєвідства передаст два млн зл на активну охорону біолоґічной ріжнорідности і краєвиду, через выпасаня овец на обшыри десятьох реґіонів, м.ін. Ґорлицкой Землі, Новосандеччыны, Спиша ци Пєнін. Фінансова підпора трафит до бачів, котры занимают ся выпасаньом овец, дбают о природничу і культурову спадковину Малопольщы, як гірской обшыри. Конкурсовы оферты мож складати до 9. марця. Дрібниці находят ся на сайті Бюлетину Публичной Інформациі Малопольского Воєвідства. Маршалок воєвідства Вітольд Козловскій скоментувал, што самоуряд малопольского воєвідства поза природничым і краєвидовым аспектом, підперат культурове выпасаня увец з огляду на економічне значыня для обшыри з нехосенныма условіями ґаздуваня, але тіж підкрислил, што захованя пастырства в Малопольщы є важне з огляду на вельовіковы традициі локальных соспільности.

Розвиток Нижньошлезской Желізниці – нова галя в Ліґници

Презес Нижньошлезской Желізниці Даміян Ставіковскій подал, што до кінця 2023 рока в рамках догваріня з фірмом ПЕСА в галях Нижньошлезской Желізниці появит ся 12 модерных, складаючых ся з 5 части пасажерскых потягів Ельф 2. Інвестиция є одповідю на звекшаючы ся потребы жытелів Нижнього Шлеска, котры штораз частійше переміщают ся потягами. В 2022 році Нижньошлезска Желізниця перевезла 16 млн пасажерів. В половині рока плянує она урухомити нову сервісову галю в Ліґници. Тырвают кінцьовы роботы при будинку. Бартломєй Родка, пресовый представник Нижньошлезской Желізниці запрашат зазнаємити ся з офертами роботы, в звязку з плянуваным одкрытьом галі. Оферты доступны сут на інтернетовым сайті желізниці. Інвестиция реализувана є при підпорі Европейской Уніі – веце як 50 млн зл, а тіж Маршалківского Уряду Нижньошлезского Воєвідства. Вартіст веденых робіт сігат 65 млн зл.

В Войводині припомнули русиньского артисту

В суботу 25. лютого/фебурара в Кули в Сербіі прошла подія зрыхтувала з нагоды 101. річниці народжыня і 51. річниці смерти Євгена Кочыша – русиньского скульптора і маляря. В проґрамі подіі было одкрытя выставы презентуючой артисту і його доробок, показ фільму о артисті та акторска інрепретация жытя Євгена Кочыша, котру зрыхтували акторы театру Культурного Центра Куля. Євген Кочыш творил різбы в ґіпсі і бронзі в стили, што окрисляют репрезентативным експресийонізмом, малювал реалистичны портреты. Серед образів авторства Кочыша находят ся м.ін. портреты русиньскых діячів. В Рускым Крестурі, де мал дві першы індивідуальны выставы, находит ся памятник партизанта ІІ світовой войны його авторства. Євген Кочыш вмер в Сомбори.

Фот. www.gov.pl