Сумар дня на 20. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 20. лютого/фебруара 2023 р.

Studium Carpato-Ruthenorum 2023

Інститут Русиньского Языка і Культуры Пряшівского Університету просит на 11. річник Медженародной Літньой Школы Русиньского Языка і Культуры Studium Carpato-Ruthenorum 2023. В тым році літня школа буде проходила в днях од 11. червця/юнія до 1. липця/юлия. Школа одбуде ся першый раз по долгій перерві, єй 10. річник проходил аж в 2019 р. Studium Carpato-Ruthenorum то шторічный едукацийный проґрам заміряный на вчыня русиньского языка, істориі, літературы, культуры і етноґрафіі карпатскых Русинів. Лекциі ведены сут в русиньскым і анґлицкым языку і берут в них участ ученикы з ріжных держав. Інститут Русиньского Языка і Культуры Пряшівского Університету реализує проґрам од 2009 рока. Є то єдина того рода школа на світі.

Нова выстава в Музею Никыфора

Музей Никыфора в Креници просит на выставу прац лемкіского маларя примітивісты Епіфана Дровняка, якы походят з колекциі Центра Культуры в Креници. В Музею Никыфора будут презентуваны першыраз. Колекция рахує 61 прац, з чого запрезентуваных буде 45 образів. Вернісаж выставы одбуде ся уж в тоту пятницю 24. лютого/фебруара в само полудне. Пак буде єй мож обзерати іщы до 21. мая тр. Як подає куратор музею Збіґнєв Волянін, креницка колекция є єдном з найціннійшых, сут в ній м.ін. бескідскы ляндшафты, образы церкви, желізницьовых стаций, святых, архітектура. Цінным елементом колекциі сут малы образкы, на котрых сут сельскы і містецкы кухні. Окрем Крениці на образах сут тіж Поворозник і Мушына, де артиста одвиджал знаємых лемківскых ґаздів. За Воляніном, днес колекция може ся добрі придати ґу промоциі Крениці, так як Никыфор стал правдивым «амбасадором» курорту серед люди штукы на цілым світі.

Розвиток туристичного бізнесу в Яслисках

В Яслисках удоступнили туристам першу з парудесятьох пивниц з XVI столітя. Колиси были они хоснуваны до триманя бочок з Мадяр. Потім были забыти і оставали закрыты через остатні декады. Тепер вертают як туристична атракция. Перша з близко тридцетьох пивниц, якы ся находят під забудуванями давного місточка, была піддана консерваторско-ремонтовым працам і удоступнена туристам. Дальщы ждут на заґаздуваня подля давно опрацуваного проєкту. Проєкт передвидує получыня пивниц сітю специяльно зробленых коридорів, так само як пивниці выконаных з каменя і з романьскым луком над головом. Одкрытя першой з пивниц было сперте дотацийом од Локальной Ґрупы Діяня «Краіна Нафты» в высокости 275 тис. злотых. Проєкт є великом шансом для розвитку туристичного бізнесу в Яслисках.

Новый гармоноґрам трансмісий православных св. літургій

Канцелярия Православного Митрополиты Варшавского і цілой Польщы подала інформацию про гармоноґрам трансмісий і ретрансмісий православных св. літургій, якы будут передаваны на державным телевізийным каналі TVP Kultura в текучым році. Серед парохій, з котрых будут трансмітуваны св. літургіі, сут і тоты з Вроцлавско-Щеціньской Єпархіі, на теренах якой жыє великє чысло Лемків. Вшыткы трансмісиі будут о 8.00 год. В неділю 9. липця/юлия буде перенос Службы Божой з лемківской парохіі Успіня Пресвятой Богородиці в Зимній Воді. Пак в неділю 27. серпня/авґуста в державній телевізиі буде мож обзерати перенос св. літургіі з церкви Рождества Пресвятой Богородиці в Ґожові Великопольскым.