Сумар дня на 21. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 21. лютого/фебруара 2023 р.

Новы дотациі для приграничных проєктів

Міністерство Інвестиций, Реґіонального Розвитку і Інформатизациі Словацкой Республикы оголосило першый набір з новых европейскых фондів. В рамках спільного проґраму Interreg Польща-Словация мож ся старати о фінансову підпору в трьох катеґориях. Перша пуля пінязів буде презначена на реализацию проєктів направленых на протидіяня природничым катастрофам і адаптацию до змін климату. Друга – на проєкты, котры мают на ціли охорону цінных природничых обшыри. Найбільша част унійного дофінансуваня буде презначена на піднесіня якости трансграничной дороговой інфраструктуры – будут гев реализуваны такы проєкты як будова ходників, роверовых стежок ци зміна асфальту. О фінансову підпору можут ся старати проєкты реализуваны в Жыліньскым і Пряшівскым Самосправным Краю та окресі Спишска Нова Вес в Кошыцкым Самосправным Краю, а в Польщы в воєвідствах: малопольскым, підкарпатскым і шлезскым.

З Крениці до Бардийова

Тырвают працы над урухомліньом автобусового получыня з Крениці до Бардийова. О трансграничным получыню бесідує ся уж од долшого часу, єднак зо взгляду на ріжного рода перешкоды пляны были перекладаны. Тепер власти Крениці рахуют, же одкрыют ленію іщы в червци/юнію перед початком Европейскых Ігр. Старают ся о тото Малопольскє Воєвідство і Пряшівскій Край. Як передал бургомайстер Крениці, Пьотр Рыба, тырвают тепер консультациі медже сторонами. Пресова представничка ПК Даша Єленьова поінформувала, же протягом послідніх місяців самоуряд дбал о дополніня формальности, котры дадут можливіст одкрыти ленію. Автобусове получыня то зыск для обох міст і можливіст туристичного розвитку. На тоту хвилю не знатя іщы, ци перевозник буде з Польщы ци Словациі. На сайті креницкого уряду находит ся петиция, котру мож підписати про высловліня свойой підпоры для урухомліня новой леніі.

На стрічы Стоваришыня Копальничых Ґмін бесідували про новы розвязаня і зміны

В Ястшембю прошла стріча Стоваришыня Копальничых Ґмін в Польщы, котрого членом єст ґміна Польковиці. В звязку з тым участ в стрічы взял тіж бургомайстер Польковиц Лукаш Пузнєцкій. Як поінформувал, головном темом той стрічы была трансформация Выжнього Шлеска, особливо місц, де уж закрыто або зачато закрывати копальничу діяльніст. Бесіды тыкали м.ін. змін, якы пройдут на Выжнім Шлеску, і можливости выкорыстаня фінансовой підпоры з европского Фонду для Справедливой Трансформациі. В плянах на будуче єст тіж орґанізация стрічы, яка посвячена буде Мідьовому Басенови, што безпосередньо тыкат ґміны Польковиці і быти може даст шансы на розвиток.

Наступна туристична атракция в Низкым Бескіді

Ґміна Ґорлиці оголосила конкурс на выконавцю выдоковой вежы в Домініковицях. Вежа стане на єдным з вершків положеных коло туристичной пути на Лысулю. З новой атракциі мож буде обзерати Ґорлиці, Низкій Бескід і Цєнжковицкє Погіря. Вежа буде мала 32 м высокости, видокову плятформу і зъізджальню. Оферты в конкурсі на выконавцю мож складати до 3. марця. Закладаный в проєкті термін реализациі задачы то близко рік од дня підписаня умовы.

«Гавран» – ровоеровый райд на орієнтацию по Лемковині

Товариство з Низкого Бескіду просит на шесту едицию роверового райду на орієнтацию «Гавран». Тогорічна едиция змагань пройде в Кривій 13. мая. Орґанізаторы просят не лем професийоналистів. Змаганя пройдут на трьох трасах з ріжным рівньом трудности: для спортовців, туристів і родин з дітми. Як подают орґанізаторы – обшыр, де проходит райд, то нибы порожні села, але богаты в капличкы, придорожны кресты, церкви ци стары цмонтері, місця ідеальны для орґанізациі райду на орієнтацию. Реґістрация участи в подіі зачне ся в квітни/апріли.